The Good Dinosaur : عمل نبيل واحد يفرق!
من اجمل الامور اللى بيطرحها الفيلم، هى قدرته على طرح سؤال او استنتاج معين، والسير على خطي الاستنتاج او الاحتمال ده للنهاية.
الاسلوب ده مش جديد على الفن بشكل عام والسينما بشكل خاص.. بنشوف افلام كتير بتبدأ باحتمال زي (ماذا لو انتصر الالمان فى الحرب العالمية الثانية) على سبيل المثال، ويبدأ الفيلم او العمل فى الاستمرار من عند النقطة دي ويشوف ايه اللى هايحصل.. يمكن اقرب مثال على الامر ده فيلم Inglourious Basterds واللى بيطرح احتمال قتل هتلر فى احد العمليات الخاصة قبل نهاية الحرب العالمية… نرجع للفيلم بتاعنا
من اخراج بيتر سون وبطولة جودي جرير و نيل باتريك هاريس و بيل هادير و جون ليثجو بنشوف قصة عن كوكب الارض فى حالة عدم اصطدام النيزك اللى قضى على الديناصورات كلها.. ياتري العالم كان هايبقى شكله ازاي لو كان النيزك اللى ادي لانقراض الديناصورات مر مرور الكرام بجوار الارض؟!
الفيلم بيعرض ازاي اتطورت الديناصورات وبدأت فى الزراعة وتربية الثيران، بننتقل بعد كده لصداقه غريبه بتنشأ بين انسان وبين ديناصور من فصيلة (اباتسورس) والمغامرات المذهلة اللى بيخوضها الثنائى على مدار احداث الفيلم.
بما اننا بنتكلم عن بيكسار لازم نقول ان المستوي التقني اللى ظهر بيه الفيلم كان اروع من الخيال، بداية من الرسومات الدقيقة واللى بيتم مراعاة افضل عناصر الجودة فيها والاهتمام بادق التفاصيل، ونهاية بالتحريك الانسيابي للشخصيات واللى تم على اعلى مستوي.. وده المتوقع من انتاجات (بيكسار) بشكل عام.
نقطة ضعف الفيلم بتكمن فى بعض الملل اللى تسرب لنفسنا خصوصا فى منتصف الاحداث، واحساسنا ان مافيش نقاط قوية فى السيناريو بيعتمد عليها الفيلم للوصول لهدفه النهائى.
على الرغم من ضعف السيناريو الا ان الموسيقي التصويرية كانت قوية ومتميزة.. حالمة ومحلقة فى الخيال فى بعض المشاهد.. وسريعه جدا فى مشاهد اخري، لكن فى كل الاحوال الموسيقي كانت متناسبه بشده مع احداث الفيلم.
The Good Dinosaur من نوعية الافلام اللى الكلام عنها قليل.. لكن مشاهدتها فى السينما هاتكون تجربه جيده للاطفال وبعض الكبار اللى عاوزين يفصلوا دماغهم من اي شىء اخر لمدة حوالى ساعتين.
