Secret in Their Eyes : التريلر اقوي من الفيلم!
فى 2009 حصل الفيلم الارجنتيني El Secreto De Sus Ojos على جائزة اوسكار افضل فيلم اجنبي.. هوليود ممكن تسيب فيلم زي ده من غير ما تقدم النسخة الأمريكاني منه؟ مستحيل!
من اخراج وتاليف بيلي راي وبطولة شيوتيل إيجيوفور و جوليا روبرتس و نيكول كيدمان و مايكل كيلى بنشوف قصة فريق تابع للشرطة بيمارس عمله فى احد ايام العمل التقليدية، لكن القضية اللى بتجيلهم فجأة غير تقليدية بالمرة، لان القتيلة فيها تبقى بنت زميلتهم اللى بتشتغل معاهم فى نفس المكتب، واللى بتسعي طوال احداث الفيلم انها تجد الجاني اللى حرمها من بنتها وتنتقم منه انتقام يتناسب مع فداحة الجريمة اللى قام بيها.
الفيلم لا ينتمي لفئة افلام الاكشن، لكن ممكن نقول انه فيلم تشويق واثارة، مع Twist قوي بيحصل فى نهاية الاحداث، لكن على الرغم من قوته حسينا انه لم يؤثر فينا بالقدر الكافي، ودي كانت اسوأ حاجه حصلت لنا خلال احداث الفيلم لان الفيلم كان ممل فى الجزء الاول منه وكان عندنا حالة عشم كبيرة فى الـ Twist اللى هايحصل ومدي قوته.. لكنه للاسف كان ضعيف ومتوقع.
الاداء التمثيلي كان قوي ومتميز، وخصوصا جوليا روبرتس اللى ملامحها وشخصيتها ونظرة عينها وحتي قصة شعرها اعطونا الاحساس طوال احداث الفيلم بالعجز والضعف وانعدام الحيلة فى مواجهة المجرم اللى قتل بنتها واللى بيفلت من العدالة بحجج ملتوية وباساليب لا تخطر على البال.
الفيلم فيه بعد سياسي من خلال قضية الشباب المتردد على المسجد وازاي المخابرات بتراقبهم طوال الوقت وبتتربص بهم وبتلصق بهم اي تهم وبتحاول تزرع جواسيس وسطهم، لكن السياسة لم يكن عليها التركيز الاساسي فى القصة بقدر التركيز على الاثارة والتشويق.
الحظ لم يحالفنا لمشاهدة الفيلم الاصلي.. لكن بمستوي Secret in Their Eyes نعتقد ان الاصل اكيد كان احسن من نسخة 2015 من نفس الفيلم
