Point Break : فيلم ممنوع على اللى بيخافوا من المرتفعات!
مشاهدة فيلم Point break عبارة عن تجميع لعدد ضخم من مشاهد المخاطرات والقفز من اماكن عالية وتسلق الجبال والغوص فى البحار، مع خيط درامي خفيف بيربط كل الاحداث دي بعضها ببعض مع استعراض عالى لامكانيات التصوير بتقنيات الـ 3D … هو ده الفيلم باختصار… نتكلم بالتفصيل بقى!
من اخراج اريكسون كور وبطولة لوقا بريسي و راي وينستون و تيريزا بالمر و ادجار راميريز بنشوف قصة ظابط فى مكتب التحقيقات الفيدرالى، بيحاول يتتبع مجموعة من المجرمين الغير تقليديين، واللى بيلجأوا فى عمليات السرقة بتاعتهم على حركات خطرة بتتضمن القفز من ارتفاعات عالية او حتي القفز بدون مظلة من طائرة!
الظابط واللى له ماضى فى الحركات الخطرة بيحاول ينخرط مع العصابة فى سبيل كشف اساليب عملهم وانتهاز الفرصة المثالية، لكن الاحداث بتتطور بعد كده بشكل لم يكن فى حسبان اي بطل من ابطال الفيلم.. لكن بالنسبة لنا على الاقل الاحداث كانت متوقعه ومفهومة.
اللى لم يكن مفهوم بالنسبة لنا هو التطويل الشديد اللى تعرض له النصف الثاني من الفيلم، وخصوصا المشاهد النهائية اللى حسينا ان المخرج كان متردد يقفل الفيلم فى اي نهاية بالظبط! حتي ان باقى المشاهدين استعدوا اكتر من مرة لمغادرة القاعة، وفى كل مرة يكتشفوا ان الفيلم لسه مكمل معانا! وده للاسف اصابنا ببعض الملل.
الموسيقي التصويرية كانت اكثر من رائعة.. حماسية ومتناسقة مع الأحداث وقدرت تعيشنا فى جو من الاثارة مع تغيرات الاحداث، وطبعا ساعدها على ذلك السيناريو المتجدد دائما واللى مش بيتركنا للملل ولو للحظة واحدة من خلال الانتقال للعديد من مشاهد المخاطرات.. ويمكن العيب الوحيد للسيناريو كان الأغراق فى المشاهد الخطرة على حساب دراما الفيلم نفسها.
صورة الفيلم كانت متميزة وجميلة جدا.. كادرات واسعة ومناظر طبيعية مبهرة ومتنوعة ما بين الجبال والبحار والغابات، لكن للاسف التركيز لم يكن على المشاهد دي بقدر ما كان على المشاهد الخطرة اللى بيتم تنفيذها فى الاماكن دي.
اخر حاجه نقدر نقولها بخصوص Poin Break هى اننا مش بنرجح مشاهدته للمشاهدين اللى بيخافوا من المشاهد الخطرة او المرتفعات لان الفيلم بيلعب على التيمة دي طوال الوقت تقريبا.. احنا حذرناكم اه
