Out of the Dark : فيلم رعب ملىء بالاستهتار
على الرغم من افكار الرعب الجديدة اللى بدات تظهر مؤخراً زي the perfect guy او no escape وهى الافلام اللى مش الكل بيعتبرها افلام رعب وممكن يصنفها على انها افلام اثاره او اكشن، الا اننا شايفين ان هو ده الاتجاه الحقيقي اللى المفروض افلام الرعب تسير فيه.. لكن افلام زي افلام الاشباح والعفاريت اصبحت مكررة ومستهلكة ومافيش جديد فيها.. للاسف.
من اخراج ليلوس كويليز و تاليف اليكس باستور بنشوف قصة اسرة بتنتقل للاقامة فى دولة جديد هى كولومبيا ومدينة جديدة.. الاسرة بتتكون من الاب بول والام سارة (سكوت سبيدمان و جوليا ستايلز على الترتيب) ومعاهم ابنهم.. الامر اللى بيتطلب منهم احضار مربية علشان تقعد معاه لما يكونوا مش موجودين.
فى غيابهم بيشوف الولد حاجات غريبة جدا.. اطفال صغار بيظهروا له من كل مكان.. وشوهم غريبة ومحروقة.. الامر اللى بيعيد فى الاذهان –لما الاب والام بيكتشفوا اللى بيحصل- قصة قديمة عن لعنة اصابت البلد نتيجة حادث قديم تسبب فى حرق عدد كبير من الاطفال الصغار وهم احياء.. الامر اللى بيخلى اشباحهم تحوم فى كل مكان بتطلب القصاص وبتأذي الجميع.. خاصة الاطفال.
على صعيد الاخراج والسيناريو الفيلم لم يقدم اي جديد يذكر.. لدرجة اننا كنا متوقعين كل حدث وكل كلمة وكل مشهد، وطبعا كنا متوقعين النهاية زي ما كنا متوقعين البداية.. الصراحه يعني الفيلم لا يحمل اي تجديد من اي نوع لنمط الرعب اللى بينتمي له.
الموسيقي التصويرية هى كمان لم تقدم جديد يذكر، لكن الديكورات كانت جديده وجذابه وخصوصا ديكورات مشاهد الرعب اللى قدرت تنقلنا لحالة الرعب اللى المفروض الفيلم بيحاول يدخلنا فيه، على الرغم من ان الرعب الحقيقي فى الفيلم والجرعة الاساسية له مش بتبدا غير فى النصف الثاني من الفيلم بعد استهلاك النصف الاول فى مشاهد وامور مكررة ومحفوظه فى اى فيلم رعب اخر.
Out of the dark محاولة استسهالية لتقدم فيلم رعب جديد هانضيفه لقائمة افلام الرعب اللى مش بننصح حد بمشاهدتها الا عشاق الرعب اللى هايشوفوا اي حاجه قدامهم مهما كانت ضعيفه ومستهلكه.
