Mission Impossible : Rouge Nation : جزء جديد من سلسلة عظيمة
من الواضح اننا من اشد المعجبين بسلسلة افلام Mission impossible ، بالتالى كان لازم نفصل مشاعرنا الشخصية ناحية السلسلة ونحاول نخبى اعجابنا الشخصى بكل تفاصيلها، فى مقابل تقديم ريفيو متوازن وقادر على رصد الايجابيات والسلبيات الخاصة بالجزء السادس والاحدث من سلسلة المهام المستحيلة.
الفيلم من اخراج كريستوفر ماكوري وبطولة توم كروز فى دور عميل المخابرات الامريكي ايثان هانت، واللى بيقود فريق من الافراد المحترفين والمتخصصين فى مهمة جديدة ومشوقة.
الفيلم بيبدأ من نهاية الجزء الخامس واللى بنشوف (ايثان) بيتلقى فيه تعليمات بضرورة تعقب جماعة ارهابية اسمها (النقابة)، واللى بتحاول تهرب مجموعة من اسلحة الدمار الشامل على متن طائرة بيتعرض لها (ايثان) وبينجح فى انقاذ الشحنة فى اللحظات الأخيرة، لكن النقابة بتتعقبه وبتحاول تدمره تماما قبل ما يدمرها.
كل الاحداث دي بتتم بينما بيتم التنصل من ايثان وفريقه تماما من قبل الحكومة الامريكية، الامر اللى بدأ مع الجزء السابق من السلسلة (بروتوكول الشبح) واللى بيتم فيه ايضا التنصل من ايثان وفريقه، وبيكون عليه انه يشتغل اعتمادا على نفسه.
السيناريو كان مرتبط جدا بالنمط العام للسلسلة.. القصة كمان مكانش فيها تغيير عن باقى الاجزاء السابقة.. كل القصص بتعتمد على فكرة شرير بيهدد هانت بشىء معين وبيضطر انه يستمر معاه للنهاية علشان يقدر ينتصر عليه –هانت- من خلال الاستعانه بفريق المهام المستحيلة.
اخراج مشاهد الاكشن كان قوي ومتعوب عليه، خاصة مشاهد المطاردة بالسيارات والدراجات البخارية، حتي مشاهد القفز فى الماء حسينما فيها فعلا بانكتام انفاسنا خلالها، لكن لا عزاء للمنطق اللى تمت هزيمته تماما او اختفاؤه من الفيلم بالكامل تقريبا.. لكن مين قال اننا بنبحث عن المنطق فى افلام المهمة (المستحيلة)؟!
توم كروز على الرغم من تقدمه فى السن الا ان اداؤه كان رائع، وتجسيده واحساسه بالشخصية لم يتغير كانه لسه فى اول جزء، بالاضافه لاداؤه فى مشاهد الاكشن كان متقن وواضح فيه المجهود والتعب فى التحضير للشخصية.
الجميلة ريبيكا فيرجسون قدرت تأدي دور متألق لعميلة استخبارات بريطانية مشكوك فى انتماءها من قبل الجميع، وقدرت تحيرنا احنا شخصيا فى معرفة حقيقة انتمائها.. ويمكن الفيلم ده يعتبر الاكثر عمقاً على مدار السلسلة كلها، وبيفكرنا بافلام جيمس بوند اللى تمت اعادة تقديمها من جديد بالاستعانة بالبطل دانيل كريج.
Missio Impossible 6 هو افضل افلام الاكشن خلال الموسم الحالى.. واللى هايكون ازاحته عن اللقب ده صعب للغاية من خلال الافلام القادمة، ننصحكم بمشاهدته فى السينمات قبل فوات الاوان لانه يستحق المشاهدة والتركيز
