In The Heart Of The Sea : ملحمة بحرية على شاشة السينما
الأفلام البحرية اللى بتدور احداثها فى مساحات مفتوحة من البحار او المحيطات، لها افضلية عندنا، ولو اضفنا للافضلية دي حبنا للافلام اللى بتتناول قصص الكفاح للبقاء على قيد الحياه وازاي الانسان ممكن يكافح ويقاتل فى سبيل الحفاظ على حياته.. لو حطينا كل الامور دي جنب بعضها هانقول ان فيلم In the heart of the sea واحد من افضل اعمال السنة، لانه بالاضافة لكل ما سبق قدر يوظف المؤثرات الخاصة وتقنيات العرض السينمائى لصالحه.. لكن الحقيقة الفيلم لا يرتقي لمستوي افضل الافلام خلال السنة.. ليه؟
من اخراج رون هاورد وبطولة كريس هيمسورث و بنجامين وكر و جوردي مولا و سيليان ميرفي بنشوف قصة مجموعة من البحارة بيحاولوا الكفاح للبقاء على قيد الحياة، بعد تعرضهم لهجوم من حوت متوحش اثناء احد رحلاتهم الخاصة بالصيد.. الامر اللى بيضعهم فى مأزق بيحاولوا بكل طريقة يخرجوا منه بحياتهم.. فى منطقة خطيرة من المحيط.
الجزء الاول من الفيلم بيحاول يشرح ويكون العلاقات بين الافراد وبعضهم البعض، والمفروض انه بيبني عندنا الجزء العاطفي اللى هانعتمد عليه بعد كده كوقود للبقاء مترقبين ومهتمين بمعرفة الاحداث للنهاية، خاصة لو عرفنا ان الفيلم مستوحي بالفعل من احداث حقيقية.. لا ننكر شعورنا بالملل من بعض المناطق فى الجزء الاول من الاحداث، لكن بشكل عام مستوي الجزء الاول كان افضل بكتير من الجزء الاول من فيلم زي Everest على سبيل المثال، واللى كان كله ممل وغير متزن او متناسق مع باقى الاحداث.
بعد كده بياخدنا الفيلم لرحلة مثيرة تم توظيف التقنيات الحديثه للتصوير والعرض السينمائى لانتاجها بافضل شكل ممكن، والحقيقة اننا مش حابين نحرق الاحداث اكتر من كده لكن المهم انكم تعرفوا ان الفيلم بيقدم ملحمة حقيقية فى الصراع البشري للبقاء على قيد الحياه، ويكفى انكم تعرفوا ان ابطال الفيلم اتبعوا (دايت) قاسى علشان يظهروا بمظهر البحارة اللى بتناضل للبقاء على قيد الحياه.
الاداء التمثيلي للممثلين جميعا كان بيقع فى منطقة الـ(متوسط-جيد) بدون اي تمثيل مبالغ من اي بطل، جدير بالذكر هنا اننا نقول اننا بنشوف كريس هيمسورث فى محاولة ناجحة منه للخروج من شخصية (ثور) اللى كنا خايفين من انه يظل حبيس فيها طوال حياته التمثيلية، باقى الابطال اداؤهم كان جيد ايضا، وان كان الفيلم نفسه مش بيركز على منطقة الصراع اللى بيتم التركيز عليها فى التريلر، واللى يبدو ان صناعه قرروا جذب المشاهدين بمشاهد الصراع، بينما التركيز الاساسى للفيلم على القصة الانسانية لطاقم السفينة والعلاقات اللى بتجمعهم ببعض.
عشاق الافلام البحرية، والافلام المنتجة بميزانيات ضخمة وعوامل ابهار فى الصورة، اكيد هايعجبهم In The Heart Of The Seaوهايجعل زيارتهم للسينما تستحق كل جنيه مدفوع فى ثمن التذكرة، وكل دقيقة ضايعه فى مشاهدة الفيلم.
