A Dog’s Purpose : في عشق الكلاب
من القصص المشهورة عن ولاء الكلاب، قصة الرجل اللي أفني عمره في خدمة أحد الملوك، لكن حصلت وقيعة بينهم فأمر الملك بقتله بتقديمه للكلاب المسعورة، وبعد فترة قضاها الرجل مع الكلاب اللي هاتقتله، أصبحوا أصدقاؤه ورفضوا أذيته.. الكلاب طوال الوقت بتثبت أنها أفضل من كتير من البشر، وأن الحيوان أحيانا يكون أفضل من الإنسان بإخلاصه وأمانته.
فيلم A Dog’s Purpose من تأليف كاثرين ميشون اقتباسا عن رواية و. بروس كاميرون اللي بتحمل نفس الأسم، والفيلم من بطولة الأداء الصوتي لجوش جاد و بريت روبرتسون و دينيس كويد و جوليت ريلانس.
الفيلم بيحكي عن قصة كلب بيسعي لاكتشاف سبب وجوده في الحياة من خلال عدة حيوات بيعيشها مع مُلاك مختلفين، وازاي الكلب بشكل عام بيأدي أدوار مهمة جد للمجتمع، أو حتى مؤثرة في الحياة الشخصية لأصحابه.
من أكتر الأمور المميزة اللي لفتت انتباهنا في الفيلم هي الأداء الصوتي المتميز لجوش جاد، وقدرته علي أداء شخصية صعبة ومعقدة زي شخصية الكلب، لكنه قدر يأديها علي الرغم من أن كل وسائل تواصله مع الجمهور كانت فقط من خلال صوته!
الأمر الثاني المميز في الفيلم كان الموسيقي التصويرية المتميزة واللي حسينا انها بتعبر عن كل لحظة من لحظات الفيلم كما ينبغي، سواء كانت لحظة كوميديا أو رومانسية أو أكشن.
من المميز كمان في الفيلم السيناريو الشيق اللي بيبعدنا عن الملل، وقدرته على التنوع بين الكوميديا والحركة والرومانسية بدون ما يفقد الخيط الأساسي له، أما الديكورات في راينا فكانت قديمة شويه وكانت محتاجه تكون أفضل من كده، لكن بشكل عام مانقدرش نقول ان كان لها تأثير سلبي علي الأحداث.
الفيلم أعاد لذاكرتنا أفلام كتيره تناولت الكلاب كشخصيات رئيسية في أحداثها أو حتى موضوعات أساسية بتتكلم عنها، زي فيلم بيتهوفن من انتاج التسعينات أو Eight Below من انتاج 2006 أو حتي فيلم Turner & Hooch من بطولة العظيم توم هانكس.
لو كنت من محبي الحيوانات بشكل عام والكلاب بشكل خاص A Dog’s Purpose هايكون الفيلم المثالي بالنسبة لك، أما لو مكانش عندك حيوان أليف، الفيلم هايخليك عاوز تقتني واحد بأسرع وقت ممكن!
علشان تبقي عارف: الفيلم مقتبس عن رواية بتحمل نفس الاسم.
