A Madea Family Funeral : لو هاندخل الأخلاق في الكوميديا مش هانشوف الفيلم!
لو دخلت فيلم A Madea Family Funeral مع مجموعة من أصحابك هاتخرجوا وكل واحد فيكم عنده تقييم مختلف تماما للفيلم. يمكن لأن الفيلم بيكسر كل القواعد الأخلاقية والإنسانية لصالح غرض واحد فقط: الكوميديا. وده بقدر ما بيقدم جرعة كوميدية ممتازة لكن في المقابل ممكن يضايق بعض المشاهدين اللي مش هايقدروا يتفاعلوا مع كسر القواعد دي كلها.
A Madea Family Funeral بيحكي عن تجمع عائلي بينتج عنه سلسلة لا تنتهي من المواقف الكوميدية والفضائح العائلية اللي بتنكشف كلها في اطار كوميدي بتقوده (ماديا) اللي بيقوم بدورها تايلر بيري مع مشاركة من روما فلين و سييرا بايتون و كاسي ديفيس وغيرهم من النجوم.
المخرج والمؤلف تايلر بيري قرر أنه ينتصر في فيلمه لحاجه واحده فقط هي الكوميديا ولا شيء سوى الكوميديا. علشان كده هانشوف الكوميديا بكل اشكالها سواء الكوميديا المعتمدة على المواقف أو المفارقات أو حتى النكت والإيفيهات الكوميدية المباشرة. علشان كده حسينا أن السيناريو والقصة هم مجرد أداة تم استعمالها لحشو أكبر قدر ممكن من الكوميديا في الأحداث.
لو كنت من الناس اللي بتحب تنتصر لأنماط أخلاقية معينة. أو مش بتضحكك النكت المعتمدة على الايفيهات الجنسية أو العرقية يبقى A Madea Family Funeral مش هايكون الفيلم المناسب لك. أما لو قررت تتخلى عن أي حاجه مقابل حوالي ساعتين من الكوميديا الغير متوقفة يبقى الفيلم مناسب جدا لك.
