A Private War : الإعلام.. ضد الموت

مهمة تقيله لما نكتب عن صحفية ومراسلة قُتلت تحت القصف في حرب شرسة. المهمة بتكون صعبة نتيجة أننا بنحكي عن إنسان مات. وأثناء قيامه بعمله اللي بيعتبر مهم جدا على الناحية الإنسانية.

لكن من ناحيه تانيه من المميز أننا نشوف فيلم بيخلد حياة صحفية قوية ومراسلة شاركت في العديد من التغطيات تحت خط النار. فيلم توقيت نزوله قبل شهور من حفل توزيع جوائز الأوسكار. بيقول أنه هايكون منافس بقوة خاصة أن دايما الأفلام اللي بتناقش قصص أشخاص حقيقية بيكون لها نصيب خاص في جوائز الأوسكار.

A Private War بيحكي عن الصحفية والمراسلة ماري كولفين (بتقوم بدورها روزاموند بايك) واللي ماتت في القصف العسكري السوري. لكن قبل سوريا، ماري غطت أكتر من حدث لا يقلوا أهمية – أو خطورة – عن الجبهة السورية.

المميز في إخراج  ماثيو هاينيمان للعمل هو أنه على الرغم من أن الفيلم بيحكي عن شخص واحد، إلا أنه بيركز على باقي الشخصيات في الفيلم وبيستعرض دورهم في حياة ماري. وده مش غريب على مخرج تقريبا متخصص في الأفلام الوثائقية  وفاهم كويس ازاي يقدم الشخصيات اللي بيتناولها بشكل مميز بدون مايخلي المشاهد يفقد الشغف بباقي عناصر الفيلم.

وكان لازم الممثلة اللي تقدم شخصية ماري كولفين تكون ممثلة من العيار التقيل. وما نعتقدش أنه كان ممكن يكون أفضل من روزاموند بايك. روزاموند قدمت قبل كده فيلم لا يُنسى هو Gone Girl واللي قدمت من خلاله شخصية إنسانة مريضة نفسيا بتزيف حادث مقتلها علشان تهرب من زوجها!

المميز في A Private War كمان أختيار حركة الكاميرا المميزة، مع اختيار أماكن التصوير وتوظيف الجمل الحوارية لخدمة كل عناصر الفيلم بشكل بيعمل (تشابك) بين كل عناصر الفيلم علشان يقدم لنا في النهاية عمل مُلهم و (مؤلم) في نفس الوقت.

A Private War ننصح بمشاهدته لكل الصحفيين والإعلاميين والمراسلين اللي شغالين في أماكن حساسة علشان يعطيهم طاقة إيجابية عن أهمية شغلهم وتأثيره.