A Score to Settle : الجريمة لا تموت!

البعض بيتخيل أن الجريمة ممكن تختفي أثارها بعد ما بيحصل الجاني على عقابه. لكن في A Score to Settle الجريمة فضلت عايشه لحوالي ٢٠ سنة. لأن المسئولين الحقيقيين عنها لم يتم حسابهم بالشكل الصحيح.

A Score to Settle بيحكي عن المجرم المدان فرانك (نيكولاس كيدج) واللي بيخرج من السجن بعد حوالي ٢٠ سنة قضاهم بسبب تحمله الذنب بدلا من رئيسه في قضية قتل.

ومع خروج فرانك بيبدأ يدور على الجناة الحقيقيين علشان ينتقم منهم. وفي نفس الوقت بيحاول يعيد ويجدد علاقته بإبنه بعد الفترة دي كلها من الفراق. فقط علشان يبدأ يكتشف حقائق كانت أبعد ما يكون عن تخيله.

تيمة (الذنب الذي يتم التكفير عنه) تيمة مش جديدة خالص على السينما، وتنفيذها في A Score to Settle كان محتاج وتيرة أحداث أسرع بكتير. لأن المشاهد كان حاسس طوال الوقت أنه سابق السيناريو. وحتى لما حب السيناريو يعمل Twist ويقدم لنا أحداث غير متوقعة.. برضو كانت متوقعة! ودي نقطة مش قادرين نوضحها علشان ما نحرقش عليكم أهم نقطة تحول درامي في الفيلم.

نيكولاس كيدج قدم أداء هادي ومتزن ومتناسب مع سنه. كمان بنشوف أداء جيد من كارولينا ويدرا في دور سيمون و بنجامين برات في دور كيو.. وطبعا لازم نحيي محمد كريم فناننا المصري على مشاركته في الفيلم. طبعا دوره مش الأهم أو الأقوى والفيلم نفسه مش أحسن فيلم في هوليود. لكن كخطوة أولى تعتبر نقلة كبيرة لمحمد أنه يقوم بدور أمام نيكولاس كيدج.

على الرغم من تصنيف الفيلم كفيلم أكشن لكن أكبر عيب في الفيلم كان الإيقاع الواقع والغموض الشديد اللي غلف بعض جوانب القصة واللي لما بيتم الكشف عنه مش بيكون مبهر بنفس قدر انتظارنا له.

A Score to Settle فيلم جيد للناس اللي عاوزه تتفرج على فيلم بنصف ذهن بدون توقعات كبيرة للسيناريو أو الإخراج.