A Simple Favor: فيلم يجتمع فيه الغموض والرعب حاليا في السينمات

كتير من المشاهدين بيخلط بين التشويق والإثارة وبين حالة الرعب اللي ممكن تكون موجودة في بعض الأفلام. مانقدرش نلوم على المشاهدين في عدم قدرتهم على التفرقة بين الأثارة والرعب، لأن بعض صناع الأفلام نفسهم بيختلط عليهم الأمر!

علشان كده كان من أهم الأمور اللي لفتت انتباهنا في فيلم A Simple Favor هو القدرة على التفرقة بين الاثارة والرعب، والفصل على صعيد السيناريو بين كل شعور من الشعورين وتقديم كل منهم للمشاهد بشكل كافي ووافي. وده كان السبب الرئيسي في ارتفاع تقييمنا للفيلم.

A Simple Favor بيحكي عن (ستيفاني) واللي بتقوم بدورها أنا كيندريك، واللي بتحاول توصل لأي معلومة شافية عن اختفاء صديقتها المقربة إيميلي واللي بتقوم بدورها بليك ليفلي.

على الرغم من أن القصة تبدو مكررة، لكن الحبكة أو طريقة تنفيذ الفيلم على الشاشة كانت ممتازة جدا، خاصة مع وجود التواء أو Twist في الأحداث بيخلي متعة المشاهدة تزيد وبيوتر المشاهدين مع استمرار الأحداث في التقدم على عمر الفيلم الزمني اللي بيقترب من ساعتين.

لكن لازم نعترف أن الفيلم كان هايكون أضعف بكتير لولا اعتماد المؤلفة جيسيكا شارزر – وهي مؤلفة متخصصة في أعمال الرعب- على رواية دارسي بيل، وطبعا توج كل المجهود ده إخراج بول فيج واللي قدر يوظف كل المجهودات دي لصالح النسخة النهائية من الفيلم.

الرعب في الفيلم قائم على فكرة الرعب النفسي أكتر من الرعب القائم على المشاهد المفاجئة وده من مميزات الفيلم، كمان التلاعب بالألوان وأماكن التصوير واختيار زوايا التصوير كان أكتر من رائع.

A Simple Favor فيلم تشويق ورعب بيلعب على مشاعر المشاهدين بجدية واهتمام وبشكل مختلف عن معظم أفلام الرعب اللي شوفناها مؤخرا ونرشح الفيلم للمشاهدة لمحبي أفلام التشويق والاثارة.

علشان تبقى عارف: تقييم الفيلم على موقع IMDB هو ٧.٣ من ١٠