a stork’s journey: كوميديا ومغامرة ورسالة مهمة!
الجميل والمميز في كتير من أفلام الأنيميشن، هي أنها مناسبة للكبار والصغار على حد سواء، الجميل كمان أنها بتحمل في أحداثها رسائل بتشجع وتطمئن وتعطينا نظرة إيجابية للمستقبل، ورغبة في القتال دفاعا عن احلامنا، وهو ده اللي شوفناه في a stork’s journey
القصة
الفيلم بيحكي عن عصفور صغير اسمه ريتشارد، بيتربى مع مجموعة من طيور اللقلق، ولما بيأتي الوقت علشان الهجرة السنوية للطيور دي، بيضطروا يخبروا ريتشارد انه لا ينتمي لهم، وأن عليه انه يعتمد على نفسه، لكن ريتشارد بيقرر يتجه في رحلته علشان يهاجر معاهم ويعيش مغامرته الشخصية من خلال أحداث الفيلم.
فريق العمل
الفيلم من تأليف ريزا ميماري وقام بتعديل الحوار له جيفري هيلتون وقام بأداء أصوات أبطال الفيلم تيلمان دوبلر و كوبير كيلي كرامر و شانون كونلي و كريستيان جول و نيكوليت كريبيتز
الأداء الصوتي
الأداء الصوتي لأبطال الفيلم كان متميز وقادر على اقناعنا بكل واحد ودوره، ونخص هنا تيلمان دوبلر، الطفل الصغير اللي قام بدور العصفور ريتشارد، واللي قدر ينقل لنا كل مشاعر الشخصية من خلال صوته، وعلى الرغم من صغر سنه الا انه قدر يقوم بالأداء الصوتي بشكل مميز، وعلى فكره هو قام بأدوار في أفلام تانيه زي Wir sind die Rosinskis و Sugar Sand
السيناريو والحوار والأخراج
على الرغم من قدرتنا على توقع القصة بالكامل تقريبا، إلا أن طريقة كتابة السيناريو وتنفيذه على الشاشة كانت قوية وبعيدة عن الملل واجبرتنا على متابعة القصة من البداية للنهاية، بينما قدر الحوار يتحمل شرح القصة وبعض اللفتات الكوميدية في الأحداث، وكل ده يشير ان الإخراج كان قوي وواخد باله وقادر يوظف كل عنصر من عناصر الفيلم في مكانه الصحيح.
الرسومات والموسيقى والمؤثرات
رسومات الفيلم كانت قوية ومميزة، وتوزيع الألوان كان مبهر وجذاب للعين الى اقصى درجة، لكن المؤثرات الخاصة والموسيقى التصويرية لم يكونوا بالقوة اللي كنا نتوقعها، وكنا محتاجين انها تكون افضل واقوى من كده واكتر مناسبة للمستوى العام لاحداث الفيلم.
الخلاصة
a stork’s journey فيلم جميل وبيحمل رسالة وهدف سامي ومحترم ويستحق المشاهدة
علشان تبقى عارف:
الفيلم نرويجي الجنسية
