Abominable: يلا قوم استكشف العالم!

بنحب بعض أفلام الأنيميشن اللي بتحمل – بالإضافة للمتعة والمغامرة – رسالة للكبار والصغار على حد سواء. فيلم Abominable يعتبر من الأفلام دي.

Abominable بيحكي عن بنت صغيرة بتكتشف أن سطح منزلها عليه كائن (يتي) خرافي.. ومن هنا بتاخد جولة طويلة من المغامرات والكوميديا علشان ترجع الكائن ده لمنزله الأصلي.

كائن اليتي – لو حد مش عارفه – هو كائن خرافي بيؤمن بوجوده بعض الشعوب زي شعوب دول شرق أسيا. وفي الغالب بيكون وجوده مرعب لكن في فيلم Abominable بنشوف ظهور كوميدي ومحبوب للأطفال.

من أجمل الحاجات اللي عجبتنا في الفيلم هي أسلوب التحريك والرسوميات الاحترافي. اختيار الألوان في الفيلم كمان كان جميل. ولما كل ده يمتزج مع الموسيقى الحلوة حسينا أن الفيلم كله عمل لنا حالة جميلة من الاستمتاع.

الأداء الصوتي من كلو بينيت و ألبرت تساي و تنزينج نورجاي ترينور وباقي ابطال الفيلم كان جيد. أحيانا كنا بنحس أن الأصوات مش راكبة مع الشخصيات المرسومة على الشاشة لكن الموضوع ده مضايقناش بشكل كبير.

سيناريو الفيلم اللي كتبه جيل كولتون – وهو المخرج برضو- كان سريع وحيوي.. صعب قوي تحس بالملل مع الفيلم ده وده برضو من الحاجات الجميلة اللي عجبتنا في الفيلم بالإضافة للرسالة اللي بيقدمها

الجميل في رسالة فيلم Abominable انه بيدينا الحافز أننا نخرج من الشرنقة الضيقة اللي عايشين فيها ونستكشف العالم من حوالينا ونعيد اكتشاف نفسنا كمان من خلال الرحلة دي.. لكن مين عنده الجرأة والقدرة انه يعيد اكتشاف نفسه من خلال اكتشاف العالم؟