Adrift : رومانسية وسط الأمواج والأعاصير
أفلام الكوارث الطبيعية اللي بتخلينا نشعر أد ايه الأنسان ضعيف أمام غضب الطبيعة وتقلباتها بتجذب دائما عدد كبير من المشاهدين، وبيكون لها جمهور واسع من كافة الأطياف والأعمار. ومع علمنا بأن الفيلم مقتبس عن أحداث حقيقية، ده بيعطينا رغبة أكبر في مشاهدة الفيلم والاستمتاع بقصته. لأننا مؤمنين أن الحقيقة في كتير من الأحيان بتكون أغرب وأكثر تعقيدا من الخيال.
Adrift بيحكي عن الحبيبان تامي أولدهام وريتشارد شارب واللي قام بدورهم سام كلافلن وشايلين وودلي وقرارهم الجرىء بالابحار مع بعض في المحيط. قد يبدو القرار في البداية عادي وغير مثير. لكن الأحداث بتتغير 180 درجة لما بيقابل الحبيبين إعصار من أقوى الأعاصير في التاريخ. الأعصار مش بس بيختبر قدرة السفينة على الإبحار، لكنه بيختبر مشاعر الأحباء ناحية بعض ورغبة كل منهم في نجاة الأخر من الموت.
مخرج الفيلم بلتازار كورماكور تعاون مع الكاتب جوردون كانديل و ارون كانديل علشان يظهروا لنا ازاي الطبيعة ممكن تكون مرعبة وقاسية، ومن ناحية تانية ازاي ممكن مشاعر الحب يكون لها تأثير قوي على الأشخاص والجمادات في نفس الوقت. وكأن مشاعر الحب بتتحدي الموت والخوف في معركة قدروا يجسدوها أمامنا في معاني حقيقية على الشاشة.
الأداء التمثيلي للأبطال كان متميز، خاصة قدرتهم على القيام ببعض المشاهد الصعبة بنفسهم وعدم اتكالهم على فريق المؤثرات الخاصة أو الدوبليرات – على الرغم من قيامهم بدور مهم في الفيلم – لكننا بنحترم رغبة الممثلين في القيام ببعض المشاهد الخطرة بنفسهم علشان يقدموا للمشاهدين مشاهد أكثر واقعية.
فيلم Adrift من الأفلام القوية المعتمدة على قصة حقيقية مثيرة وملهمة، لكن الفيلم ممكن يكون غير مناسب للناس اللي بتخاف من البحر أو بتشعر بالدوار بسرعة. لكن محبي أفلام المغامرات الممزوجة بالدراما والرومانسية هايلاقوا ضالتهم في الفيلم ونرشحه لهم للمشاهدة بقوة.
علشان تبقى عارف: الفيلم بيعرض في مصر بتصريح رقابي للجمهور العام. يعني أي شخص مهما كان عمره يقدر يشاهد الفيلم.
