After : المخاطرة جزء من الحب
بقدر فرحتنا بمشاهدة عمل رومانسي جديد، نتيجة النقص النسبي للأفلام الرومانسية في السينمات، إلا أن قصة فيلم After جعلتنا نشعر ببعض الإحباط. تعالوا نتناقش أكتر عن فيلم After وعن سبب إحباطنا من قصة الفيلم.
After بيحكي عن بنت بتعيش حياه هادية في ظل حماية مبالغ فيها الى حد ما من أمها. لكن حياتها بتتغير لما بتدخل الجامعة وبتتعرف على زميلها الغامض واللي بيدفعها غموضه علشان تقرب منه وتحاول تستكشف شخصيته بشكل أقرب. ومن هنا بتحصل علاقة الحب اللي بنشوف تطور أحداثها على مدار الفيلم.
زي ما أحنا شايفين قصة الفيلم مكررة، ومتشابهة مع عدد كبير من الأفلام الرومانسية. وده السبب الأساسي لشعورنا بالإحباط من القصة. ولكن من ناحيه تانيه كان عندنا رهان على القدرات التمثيلية لأبطال الفيلم. ورهاننا كان في محله
الأداء التمثيلي لأبطال الفيلم جوزفين لانجفورد و هيرو فاينيس تيفن كان متميز وقوي الى ابعد الحدود. ومن الواضح أن المخرجة جيني جيج راهنت على قوة الأداء التمثيلي لأبطالها علشان تقدم قصة فيلمها المكرر بشكل مختلف الى حد ما. ومن الواضح أن الرهان كان في محله لأن فعلا الأداء التمثيلي حسن عدم رضانا على القصة بدرجة كبيرة.
من المميز في الفيلم الديكورات والموسيقى التصويرية. اختيار الكادرات وزوايا التصوير واللي ساعدوا في خلق حالة من الرومانسية الجميلة على مدار أحداث الفيلم.
After فيلم رومانسي هايعجب الجمهور اللي بيحب الأحداث الرومانسية على الرغم من مدى تكرارية القصص دي
