After Midnight : لو هاتشوفه كفيلم رعب هاتحس باحباط
لو كان تم تسويق فيلم After Midnight كفيلم درامي تقليدي فيه شوية مشاهد اكشن على بعض التشويق، كان هايحقق نجاح أفضل من تسويق الفيلم كفيلم رعب. لانه ابعد ما يكون عن الرعب.
After Midnight بيحكي عن (هانك) اللي عايش في منزل غريب شوية، وفي احد الأيام بيكتشف غياب حبيبته عن المنزل وفي نفس الوقت بيكتشف علامات خدوش لحيوان غريب على الباب، ومن هنا بيدخل في محاولة لمعرفة سبب غياب حبيبته علشان يكتشف وجود حيوان متوحش في المنطقة.
لما بنكتب ملخص القصة بنحس اننا فعلا امام العوامل الأساسية لتقديم فيلم رعب جيد. لكن تنفيذ القصة دي على الشاشة كان ضعيف، وخاصة من حيث الأنتاج اللي كان عاوز يقدم فيلم قليل التكلفة فا قدم في النهاية فيلم فيه لقطات قليلة جدا للحيوان المتوحش مع استرسال طويل في الحوارات بين الأبطال.
لكن للانصاف لازم نقول ان الاداء التمثيلي للابطال جيريمي جاردنر و بريا جرانت كان جيد، وحوار الفيلم كان مكتوب باتقان عالي، وبالمناسبة جيريمي جاردنر هو مؤلف ومخرج الفيلم بالاضافة لقيامه ببطولته!
الديكورات في الفيلم كانت ممتازة والجمع بين ديكورات المناطق المفتوحة في التصوير وديكورات المنزل كانت رائعة. كنا محتاجين نشوف لقطات بعدسات أوسع أو تصوير من الـ(درونز) اللي بتصور مشاهد من أعلى بزوايا كبيرة.
فيلم After Midnight كان هايبقى افضل لو تم الاهتمام فيه بالمؤثرات الخاصة بنفس الاهتمام بالديكورات والحوار. وكان هايبقى فيلم ممتاز لو تم تقديم الفيلم كفيلم درامي مش مرعب. ولو كان مخرجه ركز في الاخراج او التمثيل او الكتابة فقط وماقررش يعمل كل حاجه بنفسه
