After the Wedding : التمثيل لوحده مش كفايه!
لما تكون بتعمل كإعادة تقديم لفيلم تاني بيحمل نفس الإسم. المفروض مايبقاش عندنا مشكلة مع القصة. ويكون التركيز الأساسي على التمثيل. لكن صناع After the Wedding عملوا العكس! تنفيذ ضعيف للقصة مع أداء تمثيلي جيد!
After the Wedding بيحكي عن ايزابيل (ميشيل ويليامز) اللي بتدير ملجأ لليتامى في الهند. لكن الملجأ مش عارف يكمل بسبب عدم وجود تمويل. ومن هنا بتضطر ايزابيل للسفر علشان تحصل على تمويل كبير من تيريزا (جوليان مور). لكن الأحداث بتتطور بشكل مختلف عن أي توقعات.
لما بنكتب ملخص القصة بنحس أنها قوية ومترابطة. وخامة جيدة يطلع منها سيناريوهات كتير لتشعبات ممتعة للمشاهد اللي بيحب الأفلام الدرامية. لكن تنفيذ الفيلم نفسه للقصة دي كان ضعيف وأعطانا الشعور أننا بنشوف فيلم من الدرجة الثانية! من هنا عرفنا أن المشكلة في إخراج بارت فروندلتش
كمان مانقدرش ننسى مسئولية السيناريو اللي كتبه بارت فروندلتش، واللي خلى الشخصيات في الفيلم مش حقيقية ومش مبذول فيها مجهود. وبشوية مجهود كان ممكن يتم تقديم شخصيات الفيلم كشخصيات عندها أكتر من دافع وبيحركها أكتر من هدف زي الشخصيات اللي بنشوفها في حياتنا العادية لكن رسم الشخصيات وتقديمها كان ضعيف.
بعد كل ده بنشوف تمثيل قوي من ميشيل ويليامز وجوليان مور في الأدوار الرئيسية وباقي الأبطال في باقي الأدوار. لكن الأداء الجيد لوحده عمره ما كان قادر على نجاح فيلم بدون تضافر باقي عناصر الفيلم لتقديم عمل ناجح.
After the Wedding من نوعية الأفلام اللي تتفرجوا عليها في وقت فراغكم أو لو مسافرين على طريق طويل عاوزين تضيعوا فيه وقت مع أحداث قابلة للمتابعة بنصف تركيز.
