Alice Through the Looking Glass: رحلة جديدة لأليس
تقريباً مافيش حد فينا مايعرفش قصة (أليس) الشابة الجميلة اللى بتدخل أرض سحرية وبتتجول فيها، وبتتعرف على أصدقاء خارقين للعادة، والحقيقة إن الموضوع بدأ برواية كتبها تشارلز دودجسون بإسم مستعار هو لويس كارول سنة 1865، وسبب إنه كتب الرواية بإسم مستعار كان خوفه من معرفة الناس أن مدرس الرياضيات المحترم المهذب بيكتب روايات للأطفال الصغار! ومكانش يعرف أن روايته هاتكون واحده من أشهر الروايات فى التاريخ وها يتم ترجمتها لحوالى 80 لغة !
نرجع للفيلم اللى أخرجه جيمس بوبين وألفه ليندا ولفيرتون ومن بطولة جوني ديب و ميا واسيكوسكا و هيلينا بونهام كارتر بنشوف مغامرة جديدة بتبدأ فى العالم الواقعي فى البداية، من خلال أليس اللى بتقدر تقود سفينة ضخمة للخروج من إعصار وظروف طقس سيئة جداً، ثم بعد كده بنعرف ظروف حياتها الصعبة واضطرار والدتها للتخلي عن سفن والدها وتجارته، لكن كل ده بننساه بسرعة لما بنصطحب أليس فى رحله عجيبة تانية لما بتدخل لأرض العجائب من خلال المراية الموجودة فى أحدي غرف القصر اللى هى عايشه فيه!
أول وأهم حاجه لازم نتكلم عنها ونعطيها حقها هى الديكورات المتميزة والرائعة واللى نقلتنا لعالم ساحر من الجمال والخيال اللى مافيش أي شىء ممكن يوقفه.. الحقيقة أن الديكورات فى الفيلم كانت عامل من عوامل البطولة لا يمكن نسيانه أو عدم الحديث عنه أبداً، أما الموسيقي التصويرية فتناغمت مع الديكور وجه معاهم المؤثرات الخاصة والخدع علشان يخلقوا لنا حالة مبهرة للعين وشاغله للعقل على أعلي مستوي من مستويات الإبهار والتسلية.
بالنسبة للأداء التمثيلي بنشوف جوني ديب فى دور جديد عليه تماما وقدر يأديه بشكل متميز جدا، والحقيقة إن ديب من الفنانين المشهور عنهم قدرتهم على تقمص أي شخصية بيأدوها من الداخل والخارج بشكل متميز جدا، والحقيقة أن ديب قدر يثبت فى الفيلم ده إن دي حقيقة مش مجرد دعاية لأسلوبه المتميز فى الأداء، أما ميا واسيكوسكا واللى عرفنا أنها بتلعب باليه قبل ما تدخل أي دور علشان تحس بالأسترخاء، وأنها من أصول أسترالية وكانت فى الأساس لاعبة باليه قبل ما تمنعها الإصابة عن إستكمال مشوارها، ميا أداءها كان باهت شوية، على الرغم من بعض لحظات التألق التمثيلي لها ومجهودها الواضح.. لكن كان في أحسن من كده كنا نتوقعه.
الميزة فى Alice Through the Looking Glass إنه مش بس يصلح للمشاهدة للصغار.. الكبار كمان هايجدوا فيه متعة كبيرة وترسيخ لكتير من القيم العائلية وقيم الوقوف مع الصديق وقت الشدة، وكلها أمور إحنا محتاجين نشوفها ونتعلمها أكتر.
Alice Through the Looking Glass فيلم جيد بنرشحه للمشاهدة لكل شخص عنده خيال واسع وبال رايق وقدرة على الخيال والمرح.
