All I See Is You: فيلم عن استعادة البصر.. والبصيرة!

هل ممكن أن فقدان حاسة زي السمع أو البصر يخلي الإنسان يفقد البصيرة ومايبقاش عارف الحقائق اللي بتحصل حواليه؟ طيب ايه ممكن يحصل لو الأنسان ده استعاد الحاسة دي تاني؟ ايه ممكن يتغير في حياته؟ هو ده اللي بيناقشه فيلم All I See Is You

القصة

الفيلم بيحكي عن سيدة شابة متزوجة من رجل، لكنها فاقدة حاسة البصر. ومع الوقت بتدخل في سلسلة من العلاجات وبتعمل عملية بتخليها تستعيد بصرها من جديد. ومع استعادة بصرها بتبدأ تدرك أمور جديدة ومختلفة في علاقتها مع زوجها. ايه اللي ممكن يحصل للعلاقة دي بعد استعادة بطلتنا لنظرها؟

فريق العمل

الفيلم من أخراج  مارك فورستر وتأليف شون كونواي و مارك فورستر وبطولة  ويز شاثام و جايسون كلارك و إيفون ستروفسكي و بلايك ليفلي و ساهاجك بونثاناكيت

الأداء التمثيلي

لازم نقول أن الدويتو التمثيلي بين بلايك ليفلي وجيسون كلارك وباقي الأبطال كان متميز الى اقصى درجة. وقدر الممثلين باقتدار أنهم يخلونا نشعر طوال الوقت بالتوتر وأن فيه حاجه غلط بتحصل لكن بدون ما نشوف ده بشكل مباشر على الشاشة. على الأقل في الربع الأول من الأحداث.

السيناريو والحوار والأخراج

سيناريو الفيلم اعتمد على فكرة التلاعب بالمشاهدين والأيحاء بحاجات مش بتحصل، أو حاجات بتحصل ثم نكتشف مع الوقت عكسها. ومش حابين نخوض أكتر من كده في تفاصيل السيناريو علشان هانضطر نحرق مشاهدة الفيلم عليكم.

حوار الفيلم كان فيه بعض الجمل المتكلفة لكن بالإجمال سيناريو وحوار الفيلم كانوا أقوياء وده يدل على أن الإخراج هو كمان كان شايف شغله وقادر يقدم لنا في النهاية فيلم جيد ومميز.

الديكورات والموسيقى والأزياء

ديكورات الفيلم في رأينا كانت محتاجته تكون أفضل، لكن الموسيقى التصويرية قدرت تدخلنا في مود الفيلم وتخلق حالة ارتباط شرطي بين الأحداث وبين شعورنا كمشاهدين وده شيء يحسب للمسئولين عن الموسيقى التصويرية لأحداث All I See Is You

الخلاصة

فيلم All I See Is You فيلم مميز على الصعيد الدرامي وعلى صعيد الحبكة، وننصح بمشاهدته للمشاهدين اللي بيحبوا الأفلام اللي فيها تعقيدات كبيرة في الشخصيات وبتحتاج تفكير وتركيز كبيرين.

علشان تبقى عارف: تقييم الفيلم على IMDB 5.3 من 10