All Roads Lead to Rome : الرومانسية الكوميدية
عنوان الفيلم عباره عن مثل قديم مشهور، إختلف الناس اللى بتفهم فى أصول الأمثال لقسمين بخصوص أصل المثل ده.. القسم الأول بيقول إن الإمبراطورية الرومانية كانت مهتمه بعمل طرق مرصوفة وممهده بين كل مدينة تفتحها وبين روما، لسهولة الوصول لها وقمع أي تمرد يحصل فيها بسرعه، والقسم التاني بيقول إن المثل أصله فرنسى، وبيرمز للكنيسة الرومانية القديمة والمقصود به إن مهما الإنسان ضل فى تصرفاته، لازم هايرجع للكنيسة الأم فى النهاية… ياتري الفيلم كان منحاز لأي وجهة نظر من الوجهات دي؟!
الحقيقة إن الفيلم كان بيتبنى وجهة نظر ثالثة.. كوميدية خفيفه ورومانسية بحته، من خلال التأكيد على فكرة الحب الحقيقي، وإن الإنسان لو حب إنسان بجد ممكن يعمل علشانه أي حاجه، وإن العالم كله لو تأمر ضده، ده مش هايمنعه من تنفيذ مخططه بالفوز بقلب حبيبه أو حبيبته.
من إخراج إيلا لمهاجن وبطولة كلوديا كاردينالى و ساره جيسكا باركر و راؤول بوفا بنشوف قصة إمرأة بتقرر مقابلة حبيبها فى روما والزواج منه، رغم تقدمهم فى السن ورغم رفض إبنها، وبتنطلق فى رحلة بتاخد وقت الفيلم بالكامل بمشاركة بنت مراهقة عندها مشاكل كبيرة فى التواصل مع والدتها.
المطاردة اللى ابتلعت زمن الفيلم كله تقريباً فكرتنا بمطاردات الأفلام العربية زمان زي المطارده اللى بتستمر على مدار الفيلم كله فى فيلم (حماتي ملاك) مثلا، وغيرها من الأفلام اللى بتاخد من المطارده وسيله لحكي الفيلم وإدخال المشاهدين فى تفاصيل الأحداث.
الممثلة العالمية كلوديا كاردينالى لسه قادره تثبت قدرتها القوية على التمثيل وعلى تقبل فكرة تقدمها فى العمر، وقدرتها على تقديم أفلام متناسبه مع الفترة العمرية اللى هى فيها، وفى نفس الوقت بيتم الإحتفاء بها خلال تترات الفيلم من خلال عرض أغنية قديمة لها بتفكر كل محبيها بأعمالها وفنها، وكان نفسنا نجمات مصر المُسنات ياخدوا بالهم من أدائها المتناسب مع سنها، لإن عندنا فى مصر لسه هناك بعض النجمات بيعملوا أدوار مش متناسبه إطلاقا مع أعمارهم، فقط لخوف المنتجين والمخرجين من مصارحتهن بتقدمهم فى السن!
لو سألتنا عن أفضل شىء عجبنا فى الفيلم على الإطلاق هانجاوب بدون تفكير: الموسيقي التصويرية… سواء التيمة الأساسية للموسيقي واللى كانت بتنطلق مع كل مشهد مطارده أو مغامره، أو الأغاني الموجوده فى الفيلم، كلها امور كانت جميله جدا ومتميزه ومتماشيه مع الجو الإيطالى العام للأحداث، لكن لو سألتنا عن الأسوأ؟ هانقول إنه كان فى سيناريو الفيلم اللى حاول يخلط الكوميديا بالرومانسية فكانت النتيجة النهائية مش رومانسية قوي ومش كوميديه قوي.
All Roads Lead to Rome فيلم متوسط الجودة بنرشحه للمشاهدة على القنوات الفضائية مش فى السينما، وفقط لمحبى الأفلام الهادية المعتمدة على المفارقات الكوميدية والرومانسيه بشكل كبير.
