Allied : رومانسية وجاسوسية وحرب عالمية!
الحرب العالمية الثانية واحدة من أكتر الفترات فى التاريخ الإنساني ذاخرة بالأحداث والتقلبات المتميزة واللى تصلح مادة أكتر من رائعة لتقديم أفلام وأعمال سينمائية عنها.. الفترة اللى قال عنها الدكتور أحمد خالد توفيق إنها فترة رائعة للقراءة عنها ومشاهدة الأفلام عنها لكنها فترة صعبة جداً إن الواحد يعيشها أو يكون طرف فيها.
من حسن الحظ إن محرر كايرو360 اللى بيكتب الكلام ده متعمق جدا فى تاريخ الحرب العالمية الثانية، بالتالى محتاجين نوضح لكم بعض المعلومات المذكورة فى سياق الفيلم بدون توضيح.. مبدئيا لازم نعرف إن الألمان بقيادة هتلر قدروا يحتلوا فرنسا فى بداية الحرب العالمية الثانية، وعلشان يضمن الألمان السيطرة على فرنسا بدون تخصيص عدد ضخم من جنودهم وظباطهم لحفظ الأمن فى المدينة، تم الإتفاق مع الحكومة الفرنسية المستسلمةوالمهزومة، بالإحتفاظ بقوات الشرطة النظامية بسلاح خفيف لحفظ الامن فى المدينة وتفريغ الألمان لمهام أكثر قوة فى الحرب.. الحكومة اللى عينها الالمان فى فرنسا كان إسمها حكومة (فيشي) وأصبحت مع الوقت متعاونة ومتواطئة مع الالمان ضد الفرنسيين أبناء وطنهم! وأصبح لزاما على قوات الحلفاء أمريكا وانجلترا ضرب حكومة فيشي والمتعاونين معها من الألمان والفرنسيين.
فيلم Allied بيتجنب الخوض فى سيرة الحرب نفسها، وبيتكلم عن فترة بداية الحرب العالمية الثانية من حيث الحياة الإجتماعية فيها،وبيبدأ الفيلم بمشاهد افتتاحية لعميلة المقاومة الفرنسية (ماريان بيساجور) اللى قامت بدورها (ماريون كوتيلارد) واللى بتعيش كجاسوسة على الالمان فى فرنسا بعد احتلالهم لها. وبتحاول تنفذ عملية انتحارية جريئة ضد السفير الألماني فى فرنسا، وعدد من أهم أعضاء حكومة فيشي فى فرنسا… وفى سبيل تنفيذ مخططها بتتعاون مع العميل البريطاني (ماكس فاتان) اللى بيقوم بدوره براد بت… واللى بيقع فى غرامها بعد العملية وبيتجوزوا وبيعيشوا حياه جميلة.
من هنا بيبدأ الفيلم فى الخروج من خيط الحرب والدم والمعارك وتفريغنا شويه لجانب الحب والرومانسية فى الفيلم، لكن حالة الرومانسية مش بتستمر لوقت طويل علشان بتبدأ المخابرات البريطانية فى الشك فى سلوك زوجة الظابط الهمام، وبيتهموها بالجاسوسية وبيطلبوا من زوجها التعاون معهم للتأكد من كونها جاسوسة من عدمه.. الأمر اللى بياخد (ماكس) لمرحلة نفسية متغيرة تماما وصعبةجدا.
مش عاوزين نحرق الأحداث عليكم أكتر من كده، علشان فعلاً الفيلم يستحق المشاهدة بكل المشاعر الإنسانية اللى فيه،وكل الأداء التمثيلي المتميز والموسيقي التصويرية الأكتر من رائعة.
بداية لازم نقول إن الأداء التمثيلي لكل الأبطال كان أكتر من رائع.. براد بيت قدر يلعب ببراعة دور العميل السري القوي والقادر على الفصل فى مشاعره بين شغله وبين علاقته بزوجته، وإحساسه بالضياع مع إختلاط المشاعر ودخول الشغل فى الحب وإحساسه –لأول مرة- بالشك فىزوجته اللى كانت بتشاركه فى الماضي عمليات ضد الألمان.
فى دور الزوجة بنشوف (ماريون كوتيلارد) اللى قدرت تعكس إحساس براد بت وتفاصيل شخصيته كأفضل ما يكون، وفى الربع الأخير من الأحداث بتقدم أداء أكتر من رائع.
فى الأدوار المساعدة ما ننساش دور (أوجست دايهل) واللى من الواضح إنه حب الأدوار التاريخة بعد مشاركته فى فيلم Inglourious Basterds مع براد بت برضو.
الديكورات والموسيقي التصويرية كان لهم دور أكتر من رائع علشان ينقلونا زمنياً لحقبة الحرب العالمية الثانية بكل ما فيها من دمار وخراب وخوف من الموت، والإحساس طوال الوقت بالتهديد خاصة مع الشعب البريطاني اللى تعرض لقصف مستمر وغير متوقف من الطيران الألماني.
مع اقتراب موسم الأوسكار فى فبراير القادم، بنعتقد إن Allied هايكون من المنافسين الأساسيين على جوائز الأكاديمية.. خاصة مع ضعف معظم الأفلام الصادرة فى 2016
