Alvin and the Chipmunks: The Road Chip : مغامرة جديدة للسناجب المجنونة
بقالنا فترة طويلة ماشوفناش فيلم هوليودي بيخاطب كل أفراد العيلة، وبيقدم جرعة متوازنة من الكوميديا والمزيكا الحلوة والإستعراضات، فى جو من التقنية العالية والرسومات المتقنة والأداء الصوتي المُحكم.. الحقيقة اننا أمام فيلم متميز وكوميدي الى ابعد الحدود.
من تأليف راندي مايم وإخراج والت بيكر وبطولة جيسون لى وأداء صوتي لـ جاستن لونج و ماثيو جراي و جيس مكارتيني بنشوف قصة السناجب الشقية الجميلة واللى بتتسبب فى مواقف كوميدية وكارثية كتير جداً فى طريقهم لمنع زواج صديقهم من الإنسانة اللى بيحبها، خوفاً من تأثير الزواج ده على علاقته بيهم.. الأمر اللى بيأدي لسلسلة من المواقف الكوميدية اللى بيكون سوء الفهم المتبادل فيها هو البطل طوال الوقت، وهو الصانع الوحيد تقريباً للحبكة الدرامية وتسلسل سيناريو الأحداث.
عجبنا فى الفيلم سهولة السيناريو الخاص به، وهى من النوع السهل الممتنع، بمعني إن السيناريو بيتدرج من البداية للنهاية بحيث إنه يقدم لنا الأحداث بسرعة تخلينا ما نحسش بالملل وفى نفس الوقت نفهم الأحداث ونلتقط أنفاسنا من جرعة الكوميديا الدسمة اللى بيقدمها… ومن هنا لازم نقول إن الأداء الصوتي للأبطال فى دور السناجب كان أكتر من رائع، وكان واضح فيه تشرب الأبطال لروح الشخصيات اللى بيأدوها.. أما التقنية الخاصة بمزج الشخصيات دي فى أحداث الفيلم فكانت متقنة ومتميزة.
كان لازم نتكلم عن الموسيقي التصويرية فى فقرة لوحدها لأنها كانت متميزة جداً إلي حد التألق، الأغنيات كانت حماسية وما قدرناش نمنع جسمنا من الحركة البسيطة على إيقاعاتها، كمان الموسيقي كان لها دور كبير على دخولنا لمجري الأحداث وتفاعلنا معاها طوال أحداث الفيلم، ونقدر –بدون مبالغه- نعتبر مزيكا الفيلم كلها عنصر بطولة من عناصر الأحداث مانقدرش نفصله عن باقى عناصر الفيلم.
لو بتدوروا على فيلم صالح للمشاهدة لكل الأعمار وملىء بالكوميديا والإثارة والأغاني الحماسية.. مش هانرشح لكم أحسن من الجزء الجديد من Alvin and the Chipmunks
