American Made: انحرافات المخابرات الأمريكية!
على الرغم من تقدمه في العمر، إلا أن مجرد أن أي فيلم يحمل اسم الفنان توم كروز، ده بيعتبر شهادة على نجاح الفيلم وتميزه. كروز وان كان مش أفضل ممثل في العالم، لكنه واحد من الفنانين القليلين اللي بيحترموا عملهم وبيبذلوا قصارى جهدهم علشان يخرج بأفضل شكل ممكن.
القصة
فيلم American Made المقتبس عن قصة حقيقية بيحكي عن عميل للسي أي ايه الامريكية بيشتغل طيار، وبيأدي مهام للولايات المتحدة، لكنه بينحرف عن طريقه وبيتجه لتهريب المخدرات لصالح عصابات في كولومبيا. هل هايقدر ينجو بأعماله؟ هو ده السؤال اللي بيطرحه الفيلم وبيعونا لمحاولة الإجابة عليه من خلال الأحداث.
فريق العمل
الفيلم من بطولة توم كروز و دومنال جليسون و جيسي بليمونس و لولا كيرك و ساره رايت ومن اخراج دوج ليمان وتاليف جاري سبينيللي
الأداء التمثيلي
توم كروز كالعادة بيبهرنا بأداء تمثيلي متميز واهتمام كبير بالدور اللي بيقوم بيه، لكن الأدوار المساعدة في الفيلم للأسف مكانتش بنفس القوة اللي كنا نتوقعها أو اللي تتناسب للتمثيل مع كروز، ونخص هنا ساره رايت اللي قامت بدور لوسي على سبيل المثال، بالإضافة لباقي الأدوار في الفيلم.
السيناريو والحوار والأخراج
سيناريو الفيلم اعتمد على فكرة التشويق من اول مشهد للنهاية، وقدر ياخدنا بعيد عن الملل ويقنعنا بمشاهدة الفيلم حتى النهاية، وكان فيه جزء كوميدي في الفيلم لا يستهان به وده اعتمد بشكل كبير على الحوار وعلى ردود أفعال توم كروز في بعض المشاهد، وده فكرنا بالفيلم العبقري the wolf of wall street واللي جمع بين التشويق والكوميديا والحركة في نفس الوقت. أما اخراج الفيلم فاقدر يجمع كل العناصر دي في الأحداث وده مجهود لا يستهان به ويحسب له.
الديكورات والموسيقى والأزياء
ديكورات الفيلم كانت مميزة وقدرت ترجعنا لفترة الثمانينات بسهولة، كمان الموسيقى الخاصة بالفيلم والأزياء كانت متناسقة مع الأحداث والفترة الزمنية اللي بتدور فيها، وطبعا المؤثرات الخاصة ومشاهد قيادة السيارات وغيرها من الأمور كانت كلها في أفضل حالاتها، وقدر الإخراج يطوعها لخدمة احداث الفيلم بالمقام الأول.
الخلاصة
American Made فيلم قوي عن تجارة المخدرات وفساد الإدارة الامريكية، ننصحكم بمشاهدة لو من هواة أفلام الحركة في اطار سياسي مع شوية كوميديا خفيفة.
