American Pastoral : هل كانت أمريكا جنة فى الستينات؟
لو سألتونا عن أهم عامل من عوامل نجاح أي فيلم، هاتكون إجابتنا بدون تردد إن العنصر الأساسي لنجاح الفيلم هو قوة (الورق)… قوة القصة والسيناريو والحوار اللى بيشكلوا الركيزة الأولى فى أى عمل سينمائي قوي ومتميز وقادر على المنافسة.
وبالنسبة لفيلم American Pastoral كان من الواضح إن الفيلم مقتبس عن رواية من أشهر الروايات الصادرة فى الولايات المتحدة للكاتب فيليب روث واللى قدر المخرج إيوان ماكجريجور يحولها لفيلم قوي ومتميز بمساعدة جون رومانو فيما يتعلق بالسيناريو والحوار.
الفيلم من بطولة إيوان ماكجريجور وهنا بيتضح لنا أهمية كون المخرج هو نفسه البطل، الأمر اللى بيعطيه القدرة على التكامل بين قدراته الإخراجية والتمثيلية، لكنه فى المقابل بيضع عليه عبء إدارة الممثلين وإدارة نفسه هو الأخر ودي حاجه مش سهلة إطلاقاً، ويمكن أشهر مثال فى المنطقة العربية على المخرج الممثل كانت مع العبقري يوسف شاهين.
بيشارك ماكجريجور البطولة جينيفر كونيلي و داكوتا فانينج و بيتر ريجرت ومولى باركر، وجدير بالذكر إن الفيلم كان له فريق أبطال مختلف تماماً مكون من بول بيتاني و ايفان ريتشل وود لكن تأخير تنفيذ الفيلم وارتباط الأبطال بأعمال تانية خلانا فى النهاية نشوف الأبطال الحاليين.
الفيلم بيحكي عن قصة أسرة أمريكية مثالية بتعيش فى فترة الستينات.. الحياة المثالية للاب والأم والإبنة مش بتستمر كتير مع تغير السياسة الامريكية ورغبة الابنة فى تغيير معتقداتها السياسية، الأمر اللى بيجر الاسرة لسلسة من المشاكل بنشوفها على الشاشة بالتزامن مع العديد من التغيرات فى المجتمع الأمريكي فى الستينات على كل الأصعدة السياسية والإجتماعية والاقتصادية، بيرصدها الفيلم بتدقيق يصل للتوثيق أحيانا.
الأداء التمثيلي لكل الأبطال كان واحد من أهم عوامل نجاح الفيلم من وجهة نظرنا، لكن عوامل تانيه كان لها جانب لا يستهان به من أسباب نجاح الفيلم زي الديكورات المتميزة وأماكن التصوير اللى كان فيها جزء كبير معتمد على المناظر الطبيعية، كمان حركة الكاميرا الهادئة الواثقة وقدرتها على نقل الأحداث بهدوء من خلال كادرات متوسطة بتركز على تفاصيل الأحداث بدون ما تجعلنا نفقد تركيزنا مع السيناريو، كل العوامل دي كان لها دور كبير فى نجاح الفيلم من وجهه نظرنا.
الموسيقي التصويرية كمان لعبت دور بارز مع الأحداث علشان نشعر بتفاصيل الأحداث على الشاشة، ونقدر نعتبر الفيلم واحد من الأفلام اللى هاتنافس على جوائز الأوسكار اللى بيتم الإعلان عنها فى فبراير 2017 لكن فى رأينا إن أفلام كتير هايتم طرحها فى الفترة القادمة هاتجعل التنافس على الأوسكار أكتر حده.
American Pastoral إمتداد لمبدأ بدأ يتكون عندنا، بإن الروايات القوية ممكن تتحول لأفلام قوية، فقط لو وقعت فى أيدي المخرجين وكتاب السيناريو المناسبين… إنتوا ايه رأيكم؟
