American Ultra : مغامرات الزمن الجميل
من وقت للتاني بنحب ننسى كل الاغاني الحديثة اللى بيسمعها ونرجع بحالى (نوستالجيا) لاغاني الزمن الجميل.. فى راينا ان فيلم American ultra بيقدم لنا حالة نوستالجيا من خلال فيلم بيفكرنا بافلام المغامرات الخفيفة الخاصة بالتسعينات! لكن هل معني كلامنا ان الفيلم سىء؟ الاجابة هى لاء.. بالتأكيد لا!
من اخراج الايراني نعمة نوريزاده وبطولة كريستين ستيوارت و جيسى ايزنبرج و كوني بريتون و توفر جريس بنشوف الفيلم اللى بيبدأ بمشاهد افتتاحية للشاب التافه محدود الذكاء جيسي ايزنبرج والمرتبط ببنت لا تقل عنه فى مستوي الذكاء هى كريستين ستيوارت.. جيسي مبتكر شخصية كارتونية تافهه بيقضى معظم وقته اللى بيشتغل فيه (كاشير) فى رسم ملامح شخصيته اللى مش بيميزها اي حاجه هى الاخري، الا ان الاحداث بتنقلب رأسا على عقب لما بيتم تحديد جيسي كشخص مطلوب قتله من قبل الـCIA !
من هنا بيحصل التحول الجذري لما بنكتشف ان الشاب التافه المدمن على الممنوعات بيتميز بقدرة غير عادية على التصدي لهجمات السى اي ايه القوية وعملائهم الذين لا يعرفون الرحمة.. وبنبدأ مع الثنائى رحلة من الهروب ومحاولة الاجابة على التساؤل اللى بيطرحه الفيلم.. مين هو جيسي ايزنبرج بالظبط؟!
على الرغم من قوة الفيلم الا اننا مش فاهمين ازاي يقبل (ايزنبرج) يقوم ببطولة فيلم زي ده بعد بطولته فيلم زي the social networkوالدور المعقد والمركب اللى قدمه ايامها فى شخصية (مارك زوكربرج) مؤسس موقع فيس بوك.. الحقيقة كنا متوقعين اختيار افضل من كده بكتير من (ايزنبرج) واللى احنا عارفين انه فنان ذكي.
الحوار كان قوي ومتميز، خصوصا فيما يتعلق بالجزء الرومانسى واللى ظهر متاخرا شويه فى احداث الفيلم، وفى بداية الاحداث اتسم الحوار بالذكاء والميل للكوميديا بدرجة كبيرة، اما طبعا مشاهد الاكشن والصراع المسلح او حتي اليدوي فتم تنفيذه بقدرة متميزة بعيدا عن مؤثرات الـ3D او المؤثرات الخاصة المبالغ فيها بشكل عام، وكل ده من اجل انتاج فيلم بينتصر لفترة التسعينات وطبيعة افلام المغامرة والاكشن اللى كنا بنشوفها ايامها.
American Ultra مش من نوعية الافلام اللى بنلاقى كلام كتير نقوله عنها.. لكن الفيلم بيتكلم عن نفسه فى دور العرض واللى للاسف لم يتم الاقبال علي مشاهدة الفيلم فيها نتيجة المنافسه فى اسبوع طرحه مع عدد كبير ومختلف من الافلام اللى ممكن تكون سحبت البساط من تحته بعض الشىء. لكن فى راينا الفيلم يستحق المشاهدة لمحبى النوع ده من المغامرات والاكشن.
