Angel Has Fallen : انسى القصة وركز في الأكشن!
بيعجبنا قوي الأفلام اللي أبطالها ومخرجينها عارفين كويس قوي هم بيقدموا أيه ولمين. صناع فيلم Angel Has Fallen عارفين أنهم بيقدموا حبكة وقصة مكررة ومعروفة من أول مشهد لأخر مشهد. لكن متعة المشاهدة والأكشن والمطاردات هي الهدف الحقيقي اللي سعى وراه صناع Angel Has Fallen
Angel Has Fallen بيستمر في الحكي عن قصة عميل الخدمة السرية مايك بانينج (جيرارد باتلر) واللي بيتولى حماية الرئيس الأمريكي الان ترومبول (مورجان فريمان) وبيتم اتهامة بمحاولة قتل الرئيس. الأمر اللي بيفرض عليه الهرب ومحاولة تبرئة نفسه والإيقاع بالجاني الحقيقي في نفس الوقت.
زي ما شوفنا القصة اللي كتبها كرايتون روثنبرجر و كاترين بنديكيت مش محتاجه مجهود كبير في المتابعة. كمان إخراج ريك رومان وو مافيهوش أي تكنيكات جديدة. كل حاجه تقليدية. لكن هل دي حاجه وحشه؟!
في رأينا أن ده كويس جداً. أحيانا بيكون من مصلحتنا نتفرج على فيلم بدون أي تعقيدات أو حبكات صعبة. لكن طبعا كان لازم نشوف حاجه حاجه مختلفة على صعيد الأكشن والمطاردات. والحقيقة الفيلم نجح في ده بشكل كبير.
تصميم مشاهد الحركة ومشاهد تبادل اطلاق النار والصراع اليدوي كانت أكتر من رائعة. المطاردات كمان كانت متميزة بدرجة كبيرة. وده اللي خلانا نشعر بالمتعة خاصة وأننا مش محتاجين كتير من التفكير بخصوص الحبكة والسيناريو.
لو كنت من محبي أفلام أكشن التسعينات وسلسلة Olympus Has Fallen و London Has Fallen الجزء الثالث Angel Has Fallen هايكون فيلم جميل ومميز بالنسبة لك.
