Anna : ثلاث أفلام مضروبين في الخلاط!
كام مرة أتفرجت على فيلم وحسيت أن بعض المشاهد أو الاطار العام للقصة مستوحى من فيلم تاني شوفته قبل كده؟ احنا شوفنا فيلم Anna وحسينا أنه مستوحى من ٣ أفلام تانيه!
Anna بيحكي عن عميلة للمخابرات الروسية KGB بيتم تكليفها بمهمة صعبة. ومع تعقيد الأحداث وتدخل أطراف تانيه بنشوف قدر كبير من مشاهد الأكشن المبتكرة واللي حسينا انها جديدة في تنفيذها.
فكرة عميلة المخابرات الجميلة اللي بتخبي تحت جمالها قسوة وعدم رحمة فكرتها بفيلم atomic blonde بطولة تشارلز ثيرون. واللي لعبت فيه دور عميلة مخابرات في فترة الحرب الباردة بين روسيا وأمريكا.
أما إسلوب إخراج مشاهد الأكشن اللي أتبعها مخرج ومؤلف الفيلم لوك بيسون ففكرنا بسلسلة أفلام John Wick واللى قام ببطولتها كيانو ريفز.
وطبعا بما أننا بنتكلم عن صراع المخابرات والأكشن اللي بيخرج من المواجهات اللي زي دي لازم نفتكر سلسلة أفلام Jason Bourne اللي بتدور في نفس العالم تقريبا.
الأداء التمثيلي لـ ساشا لوس في دور البطولة كان جيد وقدرت تقوم بالدور بشكل ممتاز. لكن من ناحية تانيه ما كناش قادرين نطلع من ذهننا فكرة أن الفيلم مقتبس من مجموعة أفلام تانيه وده ضايقنا لأننا حسينا اننا بنشوف إعادة للأفلام دي. وخلانا نحس أن صناع الفيلم مراهنين على الذاكرة القصيرة للمشاهدين.
مستوى الدم والعنف في الفيلم – مع بعض المشاهد اللي لها طابع جنسي- كان أعلى من توقعاتنا علشان كده المشاهدين المحافظين لازم ياخدوا بالهم والفيلم بشكل عام مش مناسب للأطفال
Anna فيلم أكشن على جاسوسية هايعجب اللي بيحبوا الأنواع دي من الأفلام بس لازم يكون عندهم قدرة على عدم مقارنة الفيلم بأفلام تانيه.
