Ant-Man and the Wasp: موسم الأبطال الخارقين يضرب السينمات
واضح أن صيف 2018 هايشهد تنافس كبير بين مجموعة من أفلام الأبطال الخارقين. ومن الواضح أن الأفلام الجديدة بدأت بالفعل في الوصول للسينمات بعد مشاهدتنا فيلم Deadpool2
في الجزء الجديد من سلسلة Ant man واللي بيحمل أسم Ant-Man and the Wasp بنشوف بطلنا سكوت لانج اللي بيقوم بدوره بول رود واللي بيحاول يوازن بين كونه اب ورب أسرة، وبين أنه بطل خارق. وهل هايقدر يعمل المعادلة دي بالفعل في ظل تكليفه بمهمة جديدة فيها مخاطر كبيرة وسلسلة لا تنتهي من مشاهد الأكشن؟
مخرج الفيلم بيتن ريد كان مُخلص تماما لفكرة الأبهار في كل مشهد، وأنه يستعين بالتقنيات الحديثة علشان يلعب على فكرة الأحجام وتنافرها أو تناسقها مع بعضها البعض. ودي الفكرة اللي بتقوم عليها السلسلة بالكامل من خلال استعراض بطل خارق كل القدرة اللي بيقدر عليها هي قدرته على تقليص حجمه.
تأليف كريس ماكينا واريك سومرز ساعد بشكل كبير على اظهار النواحي الأنسانية عند سكوت لانج، ويمكن الجانب الأنساني ده مش بيتم تناوله بالأهتمام الكافي في أفلام الابطال الخارقة بشكل عام على حساب مشاهد الأكشن. لكن ده لم يحدث في الجزء الجديد من Ant man
زي ما قولنا اخراج مشاهد الاكشن والمطاردات كان متميز. لكن بعض المشاهد كان سريع جدا بحيث كنا بنشعر ببعض التوهان وعدم القدرة على ملاحظة اللي بيحصل في الكادر. لكن بشكل عام نقدر نقول اننا شوفنا مجموعة من مشاهد الاكشن والمطاردات المميزة، خاصة مع الموسيقى التصويرية الحماسية واللي ساعدت على دخولنا جو الأحداث.
Ant-Man and the Wasp جزء جديد وقوي من سلسلة أفلام ابطال خارقة، ليست الأفضل لكنها قادرة على المنافسة واثبات نفسها.
علشان تبقى عارف: تقييم الفيلم على موقع IMDB 7.7 من 10
