Arctic : أخرج من منطقة أمانك!
على الرغم من أن فيلم Arctic يعتبر واحد من الأفلام اللي شارك فيها أقل قدر ممكن من الممثلين (2 فقط) إلا أن الفيلم قدر يقدم حالة مكثفة وغنية جدا من حالات التحفيز على الخروج من دائرة الأمان والبحث عن طرق جديدة ومختلفة لتحقيق النجاح.
Arctic بيحكي عن رجل بيجد نفسه مجبر على محاولة البقاء على قيد الحياة بعد تحطم طائرته في منطقة جليدية. كمان بيجد نفسه لازم ينقذ امرأة شابة موجوده معاه. على الرغم من صعوبة الموقف اللي بيمر بيه.
وبعد يأسه من وجود قوات انقاذ تقدر توصل له. بيبدأ يفكر يخرج من المكان الأمن اللي متواجد فيه ويدخل في مخاطرة كبيرة علشان يحسن فرصة إنقاذه. هل هاينجح؟
الأفلام اللي تناولت قصص أشخاص في ظروف بيئية ومناخية صعبة مش جديدة. ودايما بتقدر الأفلام دي تلفت أنتباه قطاع كبير من المشاهدين. يمكن لأن المشاهد بيضع نفسه تلقائيا مكان بطل الفيلم ويبدأ يسأل نفسه (هعمل أيه لو كنت مكانه) لكن في حالة Arctic احنا بنشوف سؤال مختلف، أو بمعنى أصح رسالة مختلفة بيحاول الفيلم يقدمها.. واختصار الرسالة دي هي ضرورة الخروج من الحيز الضيق والأمان اللي بنعيش فيه. علشان نجرب ونبتكر حاجات جديدة ومختلفة.
الأداء التمثيلي لأبطال الفيلم ماريا ثيلما سمرادوتير و مادس ميكلسن كان أكثر من رائع. وقدر المخرج والمؤلف جو بينا أنه يوظف مجهوداتهم التمثيلية بشكل متميز جدا. على الرغم من الظروف الجوية الصعبة اللي تم تصوير الفيلم فيها.
Arctic مش بس فيلم عن محاولة نجاة في ظروف صعبة. لكن فيلم بيقدم رسالة هامة وهادفة جدا عن ضرورة الخروج من المساحة الأمنة في الحياة وتجربة طرق جديدة وأساليب مختلفة لتحقيق أهدافنا.
