Arrival : التواصل مع الكائنات الفضائية.

المميز فى فيلم Arrival انه مش بيضيع وقت فى فكرة هل هناك حياة على الكواكب الأخرى أم لا.. الفيلم بيتجاوز الفكرة دي تماماً وبيبدأ السيناريو الخاص به فيما بعد اكتشاف وجود حياة على الكواكب التانية… وإزاي هايتم التواصل معاها وفهم لغتها وتطوير لغة قادرة على التواصل معاها.

من بداية ظهور فن الخيال العلمي وفكرة الحياة على الكواكب الأخرى كانت واحده من أكتر الأفكار رواجا فيما يتعلق بالأعمال الأدبية والفنية اللى تناولت مجال الخيال العلمي.. بالتالى نقدر نقول أن Arrival ماقدمش كتير جديد فيما يتعلق بالفكرة، لكن فيما يتعلق بالتنفيذ… الأمور كانت مختلفة.

Arrival من إخراج  دينيس فيلنوف وسيناريو وحوار ايريك هيزير عن قصة قصيرة كتبها تيد شيانج، أما البطولة فكانت من نصيب  إيمي آدمز و جيريمي رينر و فوريست وايتكر و جوليا سكارليت دان و تزا ما و راسل يوين.

الفيلم بيحكي عن مركبة فضائية غامضة بتظهر فى العالم كله تقريباً، الأمر اللى بيستدعي الولايات المتحدة لتكوين فريق عمل متخصص فى اللغات والتواصل مع الكائنات الأخري بقيادة (د. لويز بانكس) للتواصل مع الكيان الجديد والغامض.

وبينما العالم كله تقريباً بيستعد للدخول فى مواجهة لا يعلم مداها الا الله، بتحاول د. بانكس الوصول لإجابات شافية معرضة نفسها وفريقها لمخاطر مالهاش بداية أو نهاية.

الأداء التمثيلي لأبطال Arrival كان جيد جدا، وقدروا يقنعونا بكل تفاصيل الفيلم على الرغم من كونها تفاصيل خيالية، والحقيقة أن أفلام الخيال العلمي بتعتبر اختبار شديد الصعوبة للأداء التمثيلي للممثلين علشان بيكون مطلوب منهم طوال الوقت مش مجرد تزييف مشاعرهم –اللى هى أساس عملهم كممثلين- لكن أيضا تزييف اللى بيشوفوه ويسمعوه ويشعروا بيه بالتناغم مع المؤثرات الخاصة.

أما فى الحديث عن المؤثرات الخاصة لازم نقول أنها أدت دورها بمنتهي البراعة، وقدرت تقدم لنا أحداث ومشاهد مش موجودة فى الحقيقة إطلاقاً، لكن توظيف المؤثرات الخاصة لإنتاج المشاهد دي كان أكتر من بارع.

وبما إننا اتكلمنا عن المؤثرات الخاصة لازم نتكلم عن الديكورات اللى كانت جيدة جداً، وجعلت دخولنا سياق الأحداث سهل وسريع من المشهد الأول، والديكورات مع المؤثرات الخاصة كانت من الأمور اللى تحسب وبقوة للقائمين على الفيلم.

الموسيقي التصويرية وعلى الرغم من أهميتها كعامل أساسي فى أي فيلم خيال علمي، إلا أنها فى حالة Arrival كانت باهتة وغير قوية وحسينا إن وجودها كان زي عدمه. مش عاوزين نقول إن ده حصل فى كل مشاهد الفيلم لكن فى الغالبية العظمي من مشاهد الفيلم ده اللى كان حاصل فعلا، وللأسف دي من الأمور اللى بناخدها على الفيلم بشكل عام.

علشان تبقى عارف..

• كان المخرج (نيس ماتيو) مرشحًا لإخراج الفيلم في البداية.
• تعاون النجمان (آيمي آدامز) و(جيريمي رينر) من قبل في فيلم (American Hustle) عام 2013.