Assassin’s Creed : من الألعاب للسينما
تقريباً مافيش حد على مستوى العالم مهتم بعالم الألعاب ومنصاتها وبرامجها، إلا ويسمع عن – أو جرب – لعبة Assassin’s Creed فى أحد إصداراتها وأجزائها الشهيرة، واللى يعرفها الاعبين سواء على منصة إكس بوكس أو بلاي ستيشن.
إعتماداً على نجاح اللعبة بيتم تقديم فيلم معتمد على أحداث اللعبة.. الفيلم من إخراج جوستين كورزيل ومن تأليف مايكل ليسلى ومن بطولة مايكل فاسبندر و ماريون كوتيلارد و إرياني لابيد و بريندان جليسون و جيرمي آيرونز و مايكل كينيث ويليامز.
الفيلم بيحكي عن قصة المجرم العنيف (كالوم لينش) اللى بيقوم بدوره مايكل فاسبندر، واللى بيتم الحكم عليه بالإعدام، لكن قبل تنفيذ الحكم وبخدعة متقنة بيتم نقله للإقامة تبع مؤسسة سرية ومتطورة للغاية، وبيتم إستخدامه للسيطرة على غضبه وتجنيده للإنضمام لمجموعة من المقاتلين اللى بيسعوا وراء (تفاحة عدن) اللى ليها تأثير ديني مهم ومؤثر جدا.
أحداث اللعبة معتمدة بشكل كبير على سيرة مجموعة من المقاتلين انفصلوا عن الفاطميين فى أواخر القرن الخامس الهجري، وكان مؤسس الطائفة اللى أطلق عليها أسم (الحشاشين) الحسن بن الصباح وكان مقيم فى قلعة أسمها قلعة الموت فى فارس.
بعض التفاصيل دي بيتم ذكرها فى الفيلم، ومنها النطق العربي لكلمة Assassin والمشابه لكلمة (حشاشين).. لكن للأسف التفاصيل دي لم يتم التركيز عليها بالقدر الكافي.
الإبهار كان صاحب العامل الرئيسي للدفع بالفيلم، والمشاهد الواسعة الخارجية والتصوير من أعلي كان من أهم تقنيات التصوير فى الأحداث، كمان الخدع السينمائية والمؤثرات الخاصة لعبت دور مهم فى الأحداث.
الأداء التمثيلي للأبطال كان ضعيف، وبشكل عام لم يكن هناك اهتمام بالجانب التمثيلي على حساب إخراج وتنفيذ مشاهد الأكشن اللى كان جيد، وكان معتمد فى جانب كبير منه على مشاهد الصراع اليدوي والخدع السينمائية.
Assassin’s Creed فيلم بيستخدم التقنيات الخاصة وبيستغل نجاح اللعبة علشان يقدم فيلم مافيهوش أداء تمثيلي قوي.. ننصح بمشاهدته فى نهاية الإسبوع كفيلم منفصل بدون مقارنته بأحداث اللعبة وأجزائها المختلفة.
علشان تبقى عارف:
الملابس الخاصة بالشخصيات تم صناعتها وخياطتها بالكامل بشكل يدوي، وتم تقديم 8 قطع من كل طقم ملابس لكل شخصية، الأمر اللى كلف الفيلم فريق كامل من المتخصصين فى الملابس والإكسسوارات للعمل على مدار الساعة.
