Aux : فيلم رعب منخفض الميزانية
على الرغم من أن قلة الميزانية بتكون واحدة من أكبر (وأبوخ) المشاكل اللي بتقابل صناع الأفلا، إلا أننا شوفنا حالات كتير قدر فيها صناع الأفلام بذكاء تجاوز عقبة الميزانية القليلة. أفلام زي paranormal activity و Desperado و buried (اللي تم تصويره بممثل واحد وفي لوكيشن واحد تقريبا!) كل دي أفلام قدرت تقدم صنعة سينمائية قوية جدا ومحترمة وغير مملة وفي نفس الوقت بميزانيات قليلة للغاية. هل قدر فيلم Aux يقدم نفس الفكرة؟
الإجابة المباشرة المختصرة على السؤال هي: لا.. الفيلم وقع في التكرار وضعف السيناريو وعدم جودة الحوار، وكل دي أثار جانبية للميزانية المنخفضة اللي جعلت المخرج والمؤلف جون ادامز يستعين بممثلين بأجور منخفضة. زي جون ريس ديفيس و روزي فلينر وغيرهم.. واللي بسببهم خرج الفيلم في النهاية ضعيف وغير مترابط.
لكن هل كل الأمور كانت سيئة جدا في الفيلم؟ طبعا لا.. فكرة شبح الجندي النازي اللي بيخرج من قبره علشان يطارد الأشخاص الموجودين في أحدى المدن لشعوره بأن الحرب العالمية الثانية لم تنتهي بعد في حد ذاتها فكرة جيدة، وكان ممكن يتم معالحتها بشكل أقوى من اللي شوفناه على الشاشة.
من المشاهد القوية اللي لفتت نظرنا برضو مشهد حادثة السيارة في بداية الفيلم، كان من المشاهد اللي تم أدائها بقوة واحترافية عالية وبشكل يسبب صدمة حقيقية للمشاهدين. لكن في النهاية لا يمكن تقييمنا لفيلم يرتفع لمجرد تقديم مشهد أو اثنين بشكل قوي أو مميز!
فيلم Aux محتاج إعادة صياغة بميزانية أكبر، أو بمخرج وفريق عمل قادر على استغلال الميزانية القليلة علشان يقدم عمل أقوى وأكثر تأثيرا في المشاهدين.
علشان تبقى عارف:
الفيلم من انتاج بريطاني وحقق حتى الأن إيرادات حوالي 60 ألف دولار
