Avengers: Endgame : ختام أسطوري لعالم أسطوري
هو ده الوصف الوحيد اللي ممكن نوصف بيه الجزء الختامي لواحدة من أطول وأمتع سلاسل الأفلام في التاريخ. الجزء اللي كان بينتظره عدد كبير من المستخدمين حول العالم. أما في المنطقة العربية ومصر الإقبال كان تاريخي حرفيا. ونقدر نقول أن 99% من تذاكر السينما للفترة القادمة محجوزة من دلوقت على الرغم من الارتفاع النسبي لأسعار التذاكر. هو ده اللي بيحصل مع مع الجزء الأخير من سلسلة أفلام The avengers اللي أمتد على مدار حوالي 11 سنة من المتعة والتقنيات العالية.
Avengers: Endgame بيحكي عن ثانوس. الشرير الشهير لعالم مارفل السينمائي. واللي بينجح في تحقيق المخطط الشيطاني الخاص به وبيقضي على نصف سكان كوكب الأرض. ومن هنا بتكون مسئولية الأبطال الخارقين اللي لسه قادرين يتصدوا ثانوس أنهم يحاولوا يرجعوا الأمور لنصابها الصحيح وينقذوا ما يمكن أنقاذه.
المميز في الفيلم هو الإخراج الأكثر من رائع من أنتوني وجو روسو. والحقيقة أن اخراج الفيلم نجاح في تقديم أحداث مكثفة جدا. ومشاعر كتير جدا في زمن قياسي (حوالي 3 ساعات) واللي عدوا علينا زي ما يكونوا مجرد دقايق معدودة نتيجة قوة الفيلم وتأثيره على المشاهدين.
بنشوف في الفيلم كل المشاعر اللي ممكن نتوقعها. من تراجيديا لخوف لترقب وطبعا لا يمكن ننسى الكوميدية اللي كانت جميلة جدا ومتوظفة بشكل متميز في الفيلم.
لا يمكن ننسى نتكلم عن المؤثرات الخاصة في الفيلم واللي تنفيذها كان أكثر من رائع. وبالتزامن مع عرض الفيلم بتقنيات IMAXاللي بتخلي العرض مميز جدا كان فيه سلسلة جديدة من الدعاية للفيلم من خلال إعلانات المشروبات الغازية والموبايلات وحتى أنك لو بحثت على جوجل على thanos وضغط على شعار اليد هاتبدأ النتائج في الإختفاء!
أحداث الجزء الأخير بتمتاز بالسرعة وعدم قدرة المشاهدين على توقعها. والمميز أن التوليفة اللي جمعت بين القصة الجيدة والإخراج القوي والمؤثرات الممتازة أدت في النهاية لخلف فيلم رائع فعلا. ومع بداية أحداث النهاية للفيلم ماقدرش كتير من المشاهدين يمنعوا دموعهم رغم انهم من دقايق كانوا بيضحكوا. ودي واحدة من اعظم الأمور في الفيلم.. قدرته على التلاعب بمشاعر المشاهدين وتغييرها من النقيض للنقيض.
هل ممكن نشوف فيلم Avengers: Endgame كفيلم مستقل عن سابق الأجزاء؟ نقدر. لكن متعة المشاهدة هاتكون أقل بكتير. علشان كده بننصح بمشاهدة الأجزاء السابقة أو حتى الملخص الخاص بها علشان تزيد متعتكم في مشاهدة الفيلم.
