Avengers: Infinity War: الأبطال الخارقين في مهمة لإنقاذ العالم
على الرغم من شعورنا قبل مشاهدة الجزء الأحدث والأخير من سلسلة أفلام Avengers أننا هانكون أمام فيلم أخر من أفلام الأبطال الخارقين بدون تجديد في الحبكة، إلا أننا ومع بداية مشاهدة الفيلم شعرنا أننا أمام تجربة إنتاجية وبصرية مختلفة وجديدة تماما… تعالوا نتعرف أكتر على Avengers: Infinity War
اقتباسا عن الرواية المصورة لجاك كيربي وبناء على القصة السينمائية اللي كتبها كريستوفر ماركوس، بنشوف العالم وهو بيقع من جديد تحت قبضة كيان شرير هو (ثانوس) واللي قام بدوره جوش برولين، واللي بيحاول يجمع مجموعة من الأحجار المهمة جدا واللي بدونها كوكب الأرض هايتعرض للدمار المؤكد.
مين يقدر يتصدى لشرير بالقوة والأمكانيات دي غير فريق من الأبطال الخارقين زي الرجل الحديدي توني ستارك واللي قام بدوره روبرت داوني جونيور مع تي شالا اللي قام بدوره الممثل الأسمر شادويك بوسيمان و مارك روفالو أو الرجل الأخضر و دراكس اللي قام بدوره المصارع باتيستا، بالإضافة لمجموعة كبيرة ومميزة من الفنانين المشهور عنهم أداء شخصيات الأبطال الخارقين.
من أهم الحاجات اللي لفتت نظرنا في الفيلم هو التميز البصري الشديد، والقدرة على تقديم سينما مبهرة وتقنيات خدع سينمائية رائعة، وتضافرت العوامل دي مع تقنيات العرض الحديثة اللي أصبحت موجودة في سينمات القاهرة علشان تقدم للمشاهدين تجربة مشاهدة مميزة وممتعة في نفس الوقت.
على صعيد الأداء التمثيلي لازم نقول أن كل الممثلين تقريبا قدروا يأدوا أدوارهم ببراعة وتألق، وقدر المخرج أنتوني روسو أنه يوظف كل ممثل فيهم في المكان الملائم له. القوة دي في الأداء التمثيلي سببها مش بس براعة المخرج، لكن طول (العشرة) بين الفنانين وبين الشخصيات الخارقة اللي بيقوموا بتقديمها واللي جعلهم متمكنين من أداء شخصياتهم بدرجة كبيرة.
الموسيقى التصويرية والمؤثرات الخاصة لعبت دور مهم علشان نقدر نعيش الأحداث بشكل جيد، وكمان الديكورات وحركة الكاميرا وأخراج مشاهد الأكشن كلها كانت عوامل ساعدت على شعورنا المتواصل بالانبهار والرغبة في مشاهدة الفيلم حتى أخر لحظة.
لو كنتم من محبي أفلام الأبطال الخارقين، فيلم Avengers: Infinity War هو الخروجة المثالية بالنسبة لكم!
علشان تبقى عارف: تقييم الفيلم على موقع IMDB هو 8.9 من 10 وهو تقييم مرتفع للغاية
