Awaken the Shadowman: فيلم رعب ضعيف
أفلام الرعب بشكل عام تعتبر من الأفلام اللي بتقدم متعة كتير مقابل ميزانية قليلة. أفلام الرعب من أكتر أنواع الأفلام اللي ليها معجبين ومحبين على مستوى العالم. ومن ناحية تانيه انتاج فيلم رعب مش بيتكلف فلوس كتير. بالتالي كتير من المنتجين بتقبل على انتاج أفلام الرعب. لكن في حالة Awaken the Shadowman كان مستوى (الاستختسار) في الإنتاج أعلى بكتير!
Awaken the Shadowman بيحكي عن شقيقين بيتقابلوا بعد الأختفاء الغامض لوالدتهم. لكن التراجيديا في العائلة مش بتتوقف عند اختفاء الأم فقط. لكنها بتكون البداية لسلسلة من الأحداث المرعبة اللي مش بنعرف تفسيرها المنطقي.
قصة الفيلم اللي كتبها سكايلر كالب و وودرو ويلسون هانكوك الثالث مكررة ومتشابهة مع كتير من أفلام الرعب التانيه. لكن أخطاء الحبكة وتكرار القصة كانت ممكن تمر لو كان إخراج الفيلم أفضل من كده
مخرج الفيلم جيه. إس. ويلسون بيقدم تقريبا أول تجاربه الإخراجية، ورغم أننا المفروض نتساهل معاه كونه بيقدم عمله الأول للسينما، إلا أننا مهما اتساهلنا مش هانقدر نغفر كم الاستسهال الإخراجي والبخل الإنتاجي اللي خلوا الفيلم يخرج في النهاية بصورته النهائية الغير جيدة على الإطلاق.
للأسف الأداء التمثيلي لا يختلف كثيرا عن التأليف والإخراج. بنشوف جيمس زيمباردي و سكايلر كالب و جين سمارت في أسوأ حالاتهم التمثيلية. ومن الواضح أن الفيلم بالكامل لا يعدو كونه (سبوبه) لمحاولة عمل بعض الإيرادات.
السؤال الصعب في نهاية مشاهدتنا لفيلم Awaken the Shadowman هو لمين نرشحه؟ الحقيقة أننا نرشح الفيلم للشباب المهووس بمشاهدة أفلام الرعب مهما كان مستواها. أو المشاهدين اللي عاوزين يقضوا حوالي ساعتين من وقتهم بدون ارهاق ذهنهم بأي تفكير زايد.
