Baby Driver: فيلم مناسب لمجانين العربيات
فترة طويلة مضت علينا بدون ما نتفرج على فيلم مجنون بيخاطب المراهقين مجانين السيارات والأفلام اللي بطولتها بتكون معتمدة طوال الوقت على شخص واحد فقط.. Baby Driver واحد من الأفلام دي.
القصة
الفيلم بيحكي عن سائق مراهق شاب، متخصص في العمل عند العصابات اللي بتسطو على البنوك أو الأماكن اللي بتحتاج هروب سريع بالسيارة، وتخصصه هو الهرب من كافة محاولات القبض عليه. بطلنا ناجح في عمله الى اقصى حد وبيحقق منه فلوس كويسه، لكن بتحصل له حاجات كتير في حياته بتقلبها رأسا على عقب وبتخليه يفكر في تغيير مجرى حياته. هل هايقدر ينجح في مسعاه؟ هو ده اللي بنشوفه من خلال أحداث الفيلم.
فريق العمل
الفيلم من بطولة كيفين سبيسي و جون هام و ويلبر و فيتزجيرالد و جون بيرنثال ومن أخراج وتأليف ادجار رايت. كيفن سبيسي تعودنا عليه في مسلسل House of cards واللي شوفناها مؤخرا في موسمها الخامس، لكنه طوال الوقت قادر على تقمص أي شخصيات بيقرر يأديها
الأداء التمثيلي
زي ما قولنا كيفن سبيسي ممثل قدير بيعرف يكيف نفسه مع أي مسلسل أو فيلم بيقوم بيه، ونقدر نقول أنه زي الماء، بيتشكل بتشكل الفيلم اللي بيقوم ببطولته، كمان باقي الممثلين أداؤهم التمثيلي كان مميز وكل واحد كان قادر يقوم بشخصيته بشكل رائع.
السيناريو والحوار والأخراج
سيناريو الفيلم أبعد ما يكون عن الملل، وقدر يجمع بين الكوميديا والأكشن ومشاهد مطاردة السيارات بشكل متميز ومختلف وكان بقى لنا فترة طويلة ماشوفناهاش، أما الحوار فكان جذاب، وممكن البعض يشوفه (متفذلك) شويه لكنه ممتع رغم كل شيء، وطبعا ده ما كانش هايحصل لولا الإخراج المميز والمختلف.
الديكورات والموسيقى والأزياء
موسيقى الفيلم كانت رائعة وجديدة ومعتمدة على مجموعة رائعة من الأغاني، أما الأزياء والديكورات فعلى الرغم من قوتها ما شوفناش منها أي جديد، ونعتقد أنها كانت محتاجه تكون أفضل من كده
الخلاصة
Baby Driver فيلم ممتاز للمشاهدين الشباب والمراهقين من محبي مطاردات السيارات الصعبة والخطرة.
علشان تبقى عارف:
ايما ستون كانت مرشحة لبطولة الفيلم لكنها فضلت تقوم ببطولة lala land
