Backtrace : راحت على سلفستر ستالون ولا ايه؟!
علشان تبقى عارف: الفيلم من أنتاج كندي أمريكي مشترك وعرض للمرة الأولى في الولايات المتحدة في ديسمبر 2018
علشان تعمل فيلم قوي. ماينفعش تعتمد فقط على اسم نجم كبير زي سلفستر ستالون لأن الممثل القوي منغير مخرج كويس هايقدم في النهاية أداء تمثيلي ضعيف.
هو ده بالظبط اللي حصل مع Backtrace واللي بيحكي عن لص بينجو لوحده من عملية سطو مسلح، وبيبدأ يعيد حساباته في عالم الجريمة المعقد واللي مش بس بيشكل خطر مباشر عليه. لكن كمان على أي شخص يتعامل معاه أو يكون قريب منه.
مخرج الفيلم براين إي. ميلر ماقدمش أي جديد في الفيلم على صعيد الإخراج. يمكن لأن القصة وحبكة الفيلم نفسها مكررة وقابلة للاستنتاج بنسبة كبيرة. أما مشكلة الفيلم الأكبر فكانت في الإيقاع الكسول والبطيء وعدم وجود أحداث تقريبا. حتى أننا حسينا بملل كبير في النصف الأول من الأحداث بالكامل تقريبا.
وزي ما قولنا الأداء التمثيلي لسلفستر ستالون أتأثر بدرجة كبيرة بالإخراج الضعيف. لكن هل نقدر نقول أنها راحت على سلفستر ستالون كبطل أكشن؟ نعتقد أن الوقت لسه بدري علشان نقول كده على الرغم من تقدم ستالون في العمر (حوالي 74 سنة)
باختصار: فيلم Backtrace تشوفه بس لو كنت من عشاق سلفستر ستالون اللي مش هايفوتوا له فيلم مهما كان ضعيف او إخراجه مش على أد المستوى.
