Bad Moms مأساة بعض الأمهات فى فيلم كوميدي
الأم العزباء أو Single mothers مصطلح أصبح منتشر مؤخراً خاصة فى الدول الغربية، وبيشير لفئة من الأمهات اللى خسرت أزواجها نتيجة الطلاق أو الموت أو أي سبب أخر، وبتقرر أنها تعيش حياتها من خلال ممارسة دور الأب والأم مع بعض فى نفس الوقت.. أفلام كتير ناقشت الظاهرة دي بشكل جدي أو كوميدي، منها فيلمنا النهردة اللى قدر يجمع بين تيمة الـ Single Mother وتيمة السيدة اللى بتتنافس علشان توصل لمنصب مهم رغم صعوبة الوصول له.
من بطولة ميلا كونيس و كريستين بيل و كاثرين هان ومن إخراج وتأليف سكوت مور، بنشوف قصة سيدة بتقوم بممارسة كل أعمال المنزل وتوصيل أولادها للمدارس والإهتمام بكل تفصيلة فى الحياة الزوجية، بينما جوزها (مأنتخ) مش بيعمل أي حاجه، ثم بتكتشف فى أحد الايام أنه بيخونها على الويب من خلال علاقة الكترونية مع سيدة تانية.. الأمر اللى بيوصل العلاقة بينها وبينه للإنهيار، وبتبدأ تعيش حياتها كـ(أم عزباء) فى مجتمع مش بيرحم ومش بيقدر الظروف الصعبة للأخرين.
النصيب الأكبر للكوميديا فى الفيلم كان معتمد على المواقف الكوميدية اللى بتحصل طوال الوقت، لكن المواقف دي مكانتش طبيعية فى معظم الوقت وكانت مدبرة للكوميديا، زي مشهد انسكاب القهوة فى وجه البطلة أو تطاير المكرونه فى وجهها.. كلها مشاهد تحس أنها مش عابرة وتم تصميمها مخصوص علشان تكون كوميديه.. البعض ممكن يقول وإيه الغلط فى ده؟ المفروض ده اللى بيحصل فى كل الأفلام؟! ده حقيقي لكن المفروض المشاهد لا يشعر أن المشهد مُدبر.. وده لم نشعر به فى الفيلم.
الموسيقي التصويرية والديكورات كان لها دور مهم فى الأحداث، والموسيقي ساعدت على أننا لا نشعر بالملل طوال أحداث الفيلم اللى بتستمر على مدار حوالى ساعتين، لكن الحقيقة التركيز الأساسى فى فيلم كوميدي مش بيكون على الموسيقي بقدر ما بيكون على الأداء التمثيلي وقدرة الممثلين على إضحاكنا، والحقيقة إن الفيلم كان فعلا قادر على رسم البسمة على وجوهنا طوال أحداث الفيلم تقريبا، لكن الربع الاخير من الأحداث كان بيفتقر للكوميديا على حساب خيط جديد حسينا إن تم إقحامه على الأحداث وهو خيط محاولة البطلة الفوز بانتخابات المدرسة، وحسينا أن الفيلم بيحاول يسحبنا لخط مش خطه الأساسى، وصناع الفيلم فشلوا فى رأينا فى الموضوع ده ولو كانوا ركزوا على حياة البطلة بشكل عادي كان ممكن يكون الفيلم أفضل من كده.
Bad Moms على الرغم من إسمه اللى بيعطينا إيحاء أن الأمهات اللى فيه مش بيحبوا أولادهم وبيراعوهم، بيحكي عن قصة أمهات بيعملوا أي شىء علشان يشوفوا أولادهم أفضل.. كوميديا متميزة تستحق المشاهدة والتشجيع.
