فيلم Bait: الفك المفترس فى سوبر ماركت!
فى أوقات ثانية كنا هـ نشوف الفيلم ده من الروائع، لكن بصراحة شديدة إزاى تكلم المشاهد المصرى عن الرعب الكامن فى سوبر ماركت بـ تعوم فيه سمكة قرش عملاقة فى حين أن قطار طائش دهس أتوبيس متهالك محمل بأطفال سُمر وجُمال وكان بـ ينتظرهم مستقبل باهر، اختارنا بإهمالنا وفشلنا أننا نقتلهم قبل الأوان ونسيب لحمهم وعضمهم على قضبان الموت! رعب إيه اللى ممكن نتكلم عنه بعد الرعب اللى شوفناه من كام يوم!
الفيلم بـ يحكى عن فترة إعصار تسونامى بـ يتحاصر مجموعة من الشباب فى سوبر ماركت ملىء بالمياه، وبـ يبدأ الرعب لما بـ يكتشفوا سمكة قرش عملاقة موجودة معاهم وبـ تستهدف أنها تقضى عليهم… أو يقضوا عليها.
الفيلم اللى أخرجه كيمبل ريندال وقام ببطولته شارنى فينسون ولينكولين لويس وغيرهم من الفنانين الشباب قدم لنا نسخة سريعة من بعض المشاهد من فيلم الفك المفترس، الفيلم الأشهر اللى بـ يناقش الرعب المتعلق بعالم البحار والمخلوقات البحرية العملاقة اللى ممكن تفتك بالإنسان فى لحظة.
رغم أن تصنيف الفيلم الأمريكى لا يسمح للمشاهدين الأقل من 18 سنة بمشاهدته، بسبب المشاهد الدموية العنيفة واللغة البذيئة، إلا أننا عارفين أن دى مش الأسباب اللى تخلينا نقول على الفيلم أنه غير صالح للأطفال فى مصر لأننا لاحظنا شباب كثير قد يكونوا تحت السن فى قاعة العرض وكان الأمر ممتع جدًا بالنسبة لهم.. ولحد ما يبقى فى مصر لجنة مشاهدة حقيقية للرقابة على الفئة العمرية المسموح لها بمشاهدة الأفلام هـ نضطر نتقيد بالتصنيف الأمريكى للأفلام.
العرض بتقنية 3D ما كانش مبهر زى ما توقعنا، بالعكس ضايقنا اضطرارنا ارتداء النظارات طوال فترة الفيلم بدون أى تأثيرات خاصة، كذلك الموسيقى والديكور ما شوفناش حالة إبداع عالية فيها.
زى ما قولنا قبل كده فى ظروف أخرى كان هـ يكون الفيلم رائع أنك تشوفه، لكن حاليًا لو عاوز تتفرج على فيلم رعب حقيقى افتح قنوات الأخبار الفضائية وتابع آخر تداعيات كارثة قطار أسيوط!
