Bandit: ليه دايماً بنحب اللص الظريف!

على الرغم من أن الشخصيات الشريرة في الأفلام والمسلسلات، بتكون هي العائق اللي بيمنع البطل من تحقيق أهدافه، أو هي الشخص اللي بيأذي المجتمع والناس، لكن على مر التاريخ حظت الشخصيات الشريرة في الأعمال الفنية بحب وتعاطف عدد كبير من المشاهدين. وحتى في الروايات، لو فاكرين شخصية (أرسين لوبين) أو اللص الظريف، اللي بيساعد الشرطة في القبض على المجرمين ويتبرع بالفلوس اللي بيسرقها للجمعيات الخيرية! وطبعا مش هاننسى شخصية الجوكر الشهيرة، اللي ظهرت كشخصية مضادة لبات مان، وسرعان ما أجبر حب الناس لها على تخصيص أفلام كاملة تتكلم عن ماضي الجوكر واللي خلاه يوصل للحال اللي أصبح عليه الأن.

فيلم Bandit المقتبس عن قصة حقيقية، بيحكي عن لص البنوك المحترف (روبرت) واللي قام بدوره جوش دوهاميل. واللي بتضطره ظروف الركود الاقتصادي في أمريكا في الوقت ده، بالإضافة لزواجه وانجابه لطفل، من أنه يتجه لعالم الجريمة، ويبدأ سلسلة من عمليات السطو على البنوك، باستغلال ثغرة أمنية وبمعاونة مجرم عتيد الاجرام هو تومي – قام بالدور ميل جبسون-

على الرغم من أن القصة تبدو تقليدية، لكن عنصر المتعة الأساسي في Bandit مكانش القصة بالمقام الأول، لكن الإخراج اللي قدر يختصر في مشاهد قليلة فترات طويلة جدا من السرد، والمونتاج اللي قدم لقطات خاطفة كوميدية وتحبس النفس من فرط الأثارة في نفس الوقت. وطبعا الأداء التمثيلي لجوش دوهاميل اللي يعتبر واحد من أحسن وأهم ما قدمه الفيلم.

الأغرب والأمتع، هي الطريقة اللي حكى لنا الفيلم ازاي قدر روبرت يسرق كل البنوك دي في فترة زمنية قليلة، وازاي الشرطة مكانتش قادره تحدد هو مين. ولولا أن الفيلم مستمد من قصة حقيقية فعلا، كنا قولنا أن ده مجرد خيال. لكن واضح أن الواقع أحيانا بيكون أغرب من الخيال بمراحل.

علشان كده عرفنا ليه بنحب شخصية اللص الظريف.. لأنه بيمثل رغبتنا الدفينة في اختراق القانون والتلاعب بالنظام وتحقيق الاستفادة لنفسنا. الرغبة اللي بتجمحها قواعد قانونية ودينية واجتماعية. لكن لابأس لو شوفنا كل ده بيتم اختراقه على الشاشة من خلال أحداث فيلم، ولا سيما لو تم اختيار ممثل كاريزما لدور البطولة.

بمناسبة الكاستينج.. اختيار ميل جيبسون في دور (تومي) كان غير موفق، وكان ممكن يتم استبداله بأي ممثل تاني غير جبسون، لكن واضح أن صناع الفيلم قرروا الاستعانة بيه لأسباب ترويجية، خصوصا أن تم وضع صورته على البوستر الدعائي للفيلم لضمان أن الجمهور محبي جبسون هايدخلوا الفيلم علشان يتفرجوا عليه، وواضح أنه وافق لأسباب مادية بحته، أو لأنه بيحاول يعوض كثير من الخسارة والتخطبات اللي تعرض لها مؤخرا.

فيلم Bandit من نوعية الأفلام الخفيفة، اللي بتجمع الأكشن والكوميديا، ومش بتقدم نظرة فلسفية غامضة أو نظرية متحذلقة. كل اللي بتقدمه هو ساعتين من المتعة والاثارة. وده في حد ذاته سبب كافي يخلينا نرشح الفيلم للمشاهدة.