baywatch: كوميديا صيفية مجنونة

حاجه مميزة جدا لما نتفرج على فيلم مناسب لظروف الموجة الحارة الضخمة في الصيف الحالي.. الفيلم ده نقدر نعتبره شوية ميه بريحة اليود في عز حر الصيف.

القصة

الفيلم بيدور حول حارس انقاذ بيقع في صدام ومنافسة مع حارس الأنقاذ الجديد، الأمر اللي بيدفعه لاثبات تفوقه عليه بكل الطرق الممكنة، لكن الأحداث بتضطره للأتحاد معاه للكشف عن جريمة كبيرة بتدور أحداثها في الشاطئ اللي بتحصل عليه المنافسة بين الحارسين.

فريق العمل

Baywatch من تأليف روبرت بن جارانت وأخراج سيث جوردن، ومن بطولة دواين جونسون و زاك افرون و ألكسندرا داداريو و كيلي روهرباش.

الأداء التمثيلي

عاجبنا قوي ابتعاد دواين جونسون عن أفلام الأكشن، واستغلال قوته في شيء تاني غير تكسير الأشياء والأشخاص! وعلى صعيد اخر اكتشفنا قدراته الكوميدية الرائعة، باقي الممثلين قدموا أداء تمثيلي رائع أتصف بالكوميديا الشديدة من أول مشهد لأخر مشهد وخصوصا زاك افرون اللي قدر يوقعنا على نفسنا من الضحك في بعض المشاهد!

السيناريو والحوار والأخراج

سيناريو الفيلم معتمد اعتماد كلي على الكوميديا، والكوميديا استمدت جزء كبير منها من الحوار اللي كان مضحك فعلا، ومن الأخراج اللي نجح يخلي كل مشهد من مشاهد الفيلم قنبلة في الكوميديا، وكل الخلطة دي بيصب نجاحها في النهاية ضمن نجاح الفيلم اللي ما حسيناش بالملل أبدا واحنا بنتفرج عليه.

الديكورات والموسيقى والأزياء

ديكورات الفيلم اعتمدت بشكل أساسي على الشاطئ والبحر، وده أكسبها بعد حيوي وجميل، الموسيقى كانت صيفية وحماسية جدا وده شيء مميز، لكن الأزياء ماشوفناش فيها أي جديد

الخلاصة

فيلم Baywatch فيلم كوميدي خفيف مناسب للمشاهدة في حر الصيف

علشان تبقى عارف: الفيلم يعتبر التعاون الثاني بين كل من الممثل (دواين جونسون) والممثلة (الكسندرا داداريو).