Before I Fall : عيش كل يوم كأنه أخر يوم!
عيش كل يوم في حياتك كأنه أخر يوم.. ساعد الناس وحبهم وخليك بتشكل فارق في المجتمع والاسرة اللى انت عايش فيها كأن الحياة هاتنتهي بكرة، بالتالي كل المطامع الشخصية وكل أفعال الشر بتكون غير مؤثرة وبلا قيمة.
هي دي الفكرة اللي قدمتها الروائية لورين أوليفر واللي تم تحويلها لفيلم بيحمل نفس الاسم من إخراج ري روسو يونج ومن بطولة زوي ديوتش و هلستون سيج و إيلينا كامبوريس و اليسا لينش
الفيلم بيحكي عن سامنثا كينجستون اللي بتتعرض لظاهرة غريبة، وهي ان يومها بيعيد نفسه مرة بعد مرة، وأنها في كل مرة بتموت فيها أو تحصل لها حادثة بتصحي على أحداث نفس اليوم وهى بتعيد نفسها بالتفصيل الممل!
فكرة الفيلم وقصته مش جديدة علينا، شوفناها قبل كده في أفلام زي Groundhog Day أو حتي الفيلم العربي ألف مبروك من بطولة أحمد حلمي.
وبما أن القصة مش جديدة، فكان تركيزنا هنا على الأداء التمثيلي والخدع السينمائية والسيناريو. ولازم نقول أن سيناريو الفيلم وقعنا في بعض الملل، لكن لو ها نقارنه بالملل اللي اصابنا اثناء مشاهدة فيلم الف مبروك مثلا، يبقى فيلم Before I fall ها ينتصر بالضربة القاضية.
الأداء التمثيلي للأبطال كان جيد، وقدروا يقوموا بدور فتيات الثانوية واللي بيعيشوا ما بين مراهقة بتخلي تصرفاتهم مايله للانحراف والجنون، وبين محاولة بطلة الفيلم انها تتجنب مصيرها اللي بيعيد نفسه لسله بعد ليله.
عجبنا في الفيلم اختيار الملابس والديكورات اللي نقلتنا لعالم الفيلم بسهولة، لكن الموسيقي التصويرية كانت محتاجة تكون أقوى. وحسينا انها غير ملائمة للجو العام للأحداث.
على الرغم من العظة والعبرة اللي بيحملها فيلم Before I Fall إلا أن تكرار مشاهدتنا للفيلم بأكثر من نسخة جعلتنا متوقعين وحافظين أحداثه.
علشان تبقى عارف:
قامت كل من (زوي دويتش) و(هالستون سيج) من قبل بالمشاركة في فيلم مقتبس عن رواية، فشاركت اﻷولى في فيلم Vampire Academy، والثانية في Paper Towns.
