Before I go to sleep : إمرأة جديدة .. كل يوم!
لو حد فينا يفتكر اعلان احد ماركات الصابون الشهيرة زمان، كان بيقول ان الصابون اللى بيقدمه بروائح فرنسية خالصة، وكان الاعلان بينتهي بجملة : ” وها انت امرأة جديدة .. كل يوم” !
ده اللى افتكرناه واحنا بنتفرج على احداث فيلم Before I go to sleep من بطولة نيكول كيدمان، كولين فيرس، مارك سترونج و ان ماري دوف.
الفيلم اللى بيمتد على مدار حوالى 100 دقيقة، بيحكي عن (كريستين)، المرأة اللى بتصحي من نومها لتكتشف انها ناسية كل شىء، حتي ابسط المعلومات زي هوية الراجل النائم بجوارها، واللى بنكتشف فى المشاهد الاولى من الفيلم انه زوجها (بن)، وان كريستين مصابة بمرض نادر بيخليها تفقد الذاكرة فى كل مرة تنام فيها بالليل، علشان تصحي فى اليوم التالى “امرأه جديدة” تماما بذاكرة ممسوحه !
(كريستين) بتعرف من الدكتور (ناش) اللى بيقابلها من وراء زوجها، ان الحالة اللى هى بتاعنى منها مش نتيجة حادث سيارة زى ما زوجها قال لها، لكن نتيجة اعتداء عنيف تعرضت له (كريستين) ، الامر اللى بيخليها تفقد الثقة فى كل كلمة بيقولها لها زوجها، وتعيد حساباتها من جديد وتستعين بكاميرا لتسجيل يومياتها، علشان تضمن انها لما تصحي كل يوم تعرف بالظبط ايه اللى حصل فى اليوم السابق.
على الرغم من جودة الفكرة الا ان المخرج والمؤلف روان جوف ما قدرش يقدمها على الشاشة بشكل جيد، للاسف شعرنا بالملل فى بعض المشاهد وكان عندنا استنتاج شبه اكيد بخصوص النهاية، وللاسف ما قدرش (جوف) انه يقدم لنا حبكة اقوي او مفجأة قادرة على خداعنا.
على الرغم من الملل اللى تسرب لنا خلال احداث الفيلم، الا اننا ما نقدرش ننكر اعجابنا بالفكرة العامة للاحداث، وبالتاكيد اعجابنا الاكبر بأداء البطلة نيكول كيدمان، واللى على الرغم من تقدمها فى السن لسة قادرة تحتفظ بشبابها وحيويتها، بل وقدرتها على التمثيل والاداء باحترافيه عالية تنافس بيها شابات هوليود اللى على الرغم من جمالهن، مايقدروش يقدموا ادوار بنفس القوة دي.
كيدمان قدرت تمثل لنا دور المرأه الحائرة المهزومة الخائفة، واللى بتكتسب مع الوقت ومع تسجيل يومياتها بالفيديو قدرة اكبر على مواجهة الحقائق المختلفة اللى بتظهر فى حياتها يوم بعد يوم. الحقائق اللى مش عاوزين نحرقها عليكم علشان احداث الفيلم قابلة للتوقع بدرجة كبيرة للاسف.
كولن فيرث، واللى اداؤه السينمائى متذبذب مؤخرا اللهم الا من عمل او اثنين نقدر نحتسبهم من الاعمال القوية، كولن قدر يعمل فيلم كويس ويقدم شخصية معقدة، وقدر يظبط تعبيرات وجهه علشان ينقل لنا احساس الزوج المهزوم المخلص لزوجته، فى النصف الاول من الفيلم.
الموسيقي التصويرية ما لعبتش دور مهم فى الاحداث، لكن الديكورات كان لها نصيب اقوي فى دخولنا فى الجو العام للاحداث، وبشكل عام نقدر نقول ان فيلم before I go to sleep فيلم يستحق المشاهدة، لكن بدون اى توقعات عالية او انتظار لفيلم متميز .. هو فيلم اكشن درامي فى جو من الغموض.. والسلام!
