Belle & Sebastian: The Adventure Continues : مغامرة جميلة لكل الاعمار!
افلام المغامرات والحركة بنهتم بيها اهتمام خاص، يمكن لقدرتها على جذب شرائح واسعة ومتنوعة من الجمهور، ومناسبتها لكل افراد العائلة اللى يقدر الأب فيها يسيب ابناؤه يتفرجوا بأمان وهو واثق من استمتاعهم واستفادتهم فى نفس الوقت…
من اخراج فكريستيان دوجواي وبطولة تشيكي كاريو و فليكس بوسيت و مارجوكس شاتلير و أربيان كانسيلر بنشوف قصة مأساوية عن تحطم طائرة بتقل أم بتستعد لاستقبال ابنها بعد غياب طويل، لكن الأبن والجد بيقرروا البدء فى عملية بحث موسعة عن الأم، بالأستعانة بكلب مدرب ومحترف، وقادر على جذب اهتمام جميع المشاهدين على اختلاف اعمارهم.
بداية لازم نشيد بإسلوب التصوير الهادىء، الزوايا الواسعة للمشاهد والكادرات الجميلة والمناظر الطبيعية اللى ابدع المخرج فى استخدامها واظهارها فى احسن صورها، ولو عندنا ابطال بالاضافة للابطال الرئيسيين للعمل هايكون الابطال دول هم المناظر الطبيعية والغابات الخلابة اللى ظهرت خلال احداث الفيلم.
الأداء التمثيلي كان جيد جدا، كل دور تم اختيار ممثل لأداؤه بعنايه، لكن السيناريو الخاص بالأحداث كان بيشوبه بعض التقليدية، يعني كل شخصية كانت مرسومة فى السيناريو بتعمل دور معين ومش بتتحرك يمين او شمال بعيداً عنه، ماشوفناش Twist فى شخصيات الابطال انفسهم بقدر ما شوفنا Twist فى الاحداث نفسها وده طبعا مفهوم بالنسبة لفيلم مغامرات.
الموسيقي التصويرية ايضا كانت جميلة ومتميزة، لكنها كانت (خافتة) شويه.. بمعني انها كانت محتاجه تكون (اسخن) شويه، لاننا حسينا انها كانت بتيجي عند المواقف المهمة وتختفى تماما او تفضل محافظة على ارستقراطيتها الفرنسية المتحفظة، بدون اي قدرة على انها تلاحق على الاحداث المتسارعة.
الفيلم باختصار شديد فيلم مغامرات وتشويق صالح للمشاهدة من كل افراد الأسرة، كان هايكون اقوي لو كانت بعض عناصر الفيلم المساعدة اكثر قوة وتركيزاً على خط سير السيناريو.
