Berlin, I Love You : هل فعلا الجغرافية لها علاقة بالحب؟!
فيلم Berlin, I Love You يعتبر واحد من مجموعة أفلام بتناقش الحب والرومانسية حسب مجموعة من المدن حوالين العالم. السلسلة دي بتتعرض تحت أسم Cities of Love وسبق وشوفنا أفلام في السلسلة دي زي Paris, je t’aime و New York, I Love You و Rio, Eu Te Amo وقدرت الأفلام دي تحقق نجاح جيد.
Berlin, I Love You بيحكي عن حوالي عشر قصص حب بيربطها رابط واحد. هو أن كلها بتحصل في مدينة برلين الألمانية.
الجميل أن الفيلم بيقدم أشكال مختلفة من الحب. وبيناقش كتير من قضايا المجتمع اللي ممكن البعض يعتبرها شائكة أو حتى غير قابلة للمناقشة.
لكن من ناحية تانيه لما نتكلم عن عشر قصص حب مرة واحدة. حسينا في كتير من الأحيان واحنا بنتفرج بالزحمة وعدم القدرة على التركيز في قصة واحدة. ولأن السيناريو بيناقش أكتر من قصة في نفس الوقت كنا بنحس أحيانا بالتداخل وأحيانا بعدم قدرتنا على المتابعة مع شعورنا بالملل.
مش بس كده.. برلين كمدينة المانية لم يتم إظهارها في الفيلم بشكل رومانسي عاطفي. وعلى الرغم من كل محاولات الفيلم أنه يقدم مشاهد فيها حميمية ورومانسية فضل عندنا شعور أن برلين (جامده) ولا يمكن تقديمها كمدينة قادرة على احتضان وإبراز الحب والعواطف.
لكن من ناحيه تانيه كان عندنا أداء تمثيلي جيد من كيرا نايتلي و هيلين ميرين و لوك ويلسون وكتير غيرهم من أبطال الفيلم. ويمكن الأداء الجيد ده هو اللي خلانا نصبر شويه على القصص اللي حسينا أنها مبتورة ومش متوظفة بسيناريو قوي مترابط وقابل للمشاهدة من البداية للنهاية.
Berlin, I Love You كان ممكن يكون فيلم أفضل لو أهتم بقصة واحدة أو اتنين بدل ما يشتت نفسه في أكتر من قصة. ولو كان اختار مكان تاني للأحداث غير برلين اللي ما حسيناش أنها مدينة عاطفية قوي.
