Billionaire Boys Club : الثروة مش أهم حاجه في الدنيا!
الأفلام اللي بتتكلم عن عالم النصب أو الجرائم المالية في المجتمع، واللي بتكون مقتبسة عن قصة حقيقية بتكون دائما ممتعة. يمكن علشان المشاهدين بيسألوا نفسهم: لو معايا نفس المقدار من الثروة كنت هاعمل بيها أيه واستغلها ازاي؟ وهو ده اللي بيتكلم عنه فيلم Billionaire Boys Club
الفيلم المقبس عن قصة حقيقية بيحكي عن مجموعة من الشباب اللي بيقرروا يحققوا الثروة بطرق سريعة وغير قانونية طبعا، لكن الأمور بتتجه بيهم لطرق مختلفة ومليئة بالمشاكل والمخاطرة في سبيل تحقيق أهدافهم. وبيقدروا مع الوقت يعملوا نادي يسموه Billionaire Boys Club أو اختصارا BBC
في الأفلام اللي بتكون بطولتها جماعية، مش بنقدر نمنع نفسنا من متابعة تارون ايجرتون في دور (دين) واللي قدر يأديه بشكل مميز جدا ومختلف. مش عاوزين نقلل من قيمة باقي الأبطال زي انسيل يلجورت أو كيفن سبيسي (الخارج مؤخرا من فضيحة فنية كبيرة بسبب تحرشه بالمراهقين) لكن زي ما قولنا ايجرتون قدم أداء قوي ومميز.
من ناحية تانية حسينا أن المؤلف والمخرج جيمس كوكس اختصر الفيلم في حكاية الحدوتة من البداية للنهاية، بدون التدخل لاضافة أي جو من الكوميديا مثلا زي ما بيحصل مع أفلام تانيه بتنتمي لنفس الفئة زي Catch me if you can أو War dogsوغيرها من الأعمال اللي بتحاول تخلط أكثر من نمط بالقصة. لكن ده لم يحدث في فيلمنا.
من أجمل الأمور اللي لاحظناها في الفيلم تصميم الديكور واللي نقلنا زمانيا لفترة الأحداث، كمان استخدام الكاميرا وحركتها المميزة وبعض مشاهد الفيلم اللي تم استخدام تكتيكات ذكية جدا في حركة الكاميرا وحركة الممثلين نفسهم علشان نشعر بالابهار، كل دي كانت أمور جديدة علينا في نوعية أفلام بتلتزم بالمقام الأول بالحكاية التاريخية وسردها على المشاهدين.
Billionaire Boys Club مش احسن فيلم عن النصب والاحتيال المالي لكنه فيلم قوي ومميز ويستحق المشاهدة في الويك اند بعد نهاية اسبوع طويل من الشغل.
علشان تبقى عارف:
تقييم الفيلم على موقع IMDB 5.6 من 10
