Birdman : هل يستحق الأوسكار؟!

بداية وقبل أى شىء، احنا عاوزين نتكلم عن سوء التخطيط فيما يتعلق بتوقيت عرض الأفلام المرشحة والفائزة بجوائز الأوسكار فى السينمات المصرية.

الحقيقة احنا كنا متوقعين ان يتم عرض هذه الافلام فى مواعيد سابقه لحفل الاعلان عن الاوسكار، بحيث يقدر النقاد والمشاهدين المهتمين من متابعه الافلام قبل الاعلان الرسمي عن الجوائز، لكن يبدو ان المسئولين عن السينما فى مصر دفعوا المشاهدين دفعاً لتحميل الافلام من الانترنت بطرق غير شرعية. ودي مشكله.

الفيلم من تأليف و أخراج المكسيكي أليخاندرو جونزاليس إناريتو، وهو بالمناسبة أول مخرج ميكسيكي يُرشح لجائزة أوسكار. كما أنه أول مخرج ميكسيكي ينال جائزة أفضل مخرج من مهرجان كان السينمائي، وله افلام مهمة ومؤثرة جدا زي فيلم Babel  وغيرها من الافلام.

الفيلم أيضا من بطولة العبقري مايكل كيتون، واللى يعتبر افضل اداء له فى كل اعماله السابقه، ويشاركه فى البطولة ادوارد نورتن واللى قدم هو الاخر أداء هاينقله من صفوف الفنانين الاستهلاكيين اللى ممكن نشوفهم فى اى عمل، الى نجم مخضرم وفنان حقيقي قادر على تقمص اى دور يقوم به.

الفيلم بيحكي عن الفنان الشهير (ريجان تومسون)، واللى بيحس بانهيار اسطورته الفنية بعد نسيان الناس له، لرفضه تأدية دوره فى سلسلة افلام استهلاكية مبهرة (بيرد مان)، وبيحاول يعيد ثقة ومتابعة الناس له من جديد من خلال تقديم مسرحية قديمة بشكل جديد على مسرح برودواي الشهير بنيويورك، لكن العرض المسرحي بيتعرض للعديد من المشاكل والتقلبات، خصوصا مع انضمام ممثل جديد للفريق (ادوارد نورتون).

السؤال اللى طرح نفسه علينا بعد مشاهدة الفيلم كان : هل الفيلم يستحق اوسكار؟ فى الواقع احنا ماعندناش اجابه مباشرة على السؤال ده، لكننا شايفين ان الفيلم لم يكن يستحق جائزة افضل فيلم، لكن كان ممكن يحصد الجائزه بسهولة فى قسم المونتاج او الموسيقي التصويرية. وهو رأي مش بنتكسف – او نخاف – نعبر عنه رغم الاحتفاء اللى بيتعرض له الفيلم على المستوي النقدي او الجماهيري.

الفيلم اتصور باسلوب يوحي للمشاهد انه مشهد واحد طويل ومستمر، زوايا التصوير كانت جديدة ومختلفة، الموسيقي التصويرية كانت متوافقه مع الاحداث ومستمده من روح المسرح، اما الديكورات فكانت من احسن ما شاهدنا فى الفيلم، والمؤثرات الخاصة على الرغم من استخدامها المحدود كانت جيده جدا، باختصار نقدر نقول ان الفيلم كان متميز على كافة الاصعده، لكنه رغم كل شىء – من وجهه نظرنا – لم يكن يستحق جائزه افضل فيلم.

الفيلم بيناقش قضية فلسفية عن نظرة الانسان لنفسه والاخرين، وقدرته على تنميه قدراته وزيادتها ، وطريقه نظرته لنفسه والوصول بقدراته لاقصى حد ممكن، وفى راينا ان نهاية الفيلم كانت اقوي تجسيد على الجزء الفلسفي فى الاحداث، والحقيقه احنا مش عاوزين نتكلم كتير عن نهاية الفيلم علشان ما نحرقش الاحداث عليكم لكن نقدر نقول ان الفيلم كان هايكون افضل بكثير لو كان انتهي عند مشهد اطلاق النار فى المسرح.

Birdman فيلم ظلمه توقيت عرضه فى السينمات المصرية، بنرشحه للمشاهدة للناس اللى عندها حس فلسفي وعين بتحب تقرأ ما بين سطور العمل الفني.