Birds of Prey : أنثى الجوكر راجعه تاني!
في فيلم suicide squad شوفنا العلاقة المعقدة والغريبة بين الجوكر وبين هارلي كوين اللي قامت بدورها (مارجوت روبي) واللي ممكن نعتبرها أنثى الجوكر. واللي كانت متحدة معاه في علاقة حب. لكن في Birds of Prey بنشوف الجانب الحقيقي للعلاقة دي من خلال قصة هارلي كوين بشكل منفصل.
الفيلم بيبدأ بهارلي كوين بتحكي قصتها بنفسها. وبتعرفنا أن العلاقة بينها وبين الجوكر كانت علاقة (مسممة) وأنها قدرت تتخلص منها علشان تخلق أسطورتها الشخصية. أسطورة قائمة على الجنون والفوضى. وباقي العلامات المميزة لشخصية الجوكر على اختلاف الأفلام اللي تناولتها.
العلاقات المسممة تعتبر كلمة السر في الفيلم. بنشوف أكتر من علاقة خلال الفيلم أدت في النهاية بصاحبتها بالأنضمام لعالم الجريمة. وطبعا الفيلم فيه نزعة حقوق المرأة اللي أصبحت السمة السائدة في معظم انتاجات هوليود مؤخرا.
بعيدا عن الأداء التمثيلي لمارجوت روبي اللي قدرت تجسد شخصيتها المجنونة بشكل جيد. باقي الأداء التمثيلي لباقي الأبطال كان أقل بكتير من توقعاتنا. ومانفعتش فكرة أن تصوير الفيلم وكرنفال الألوان المتفجرة في كل مكان وتقديم الفيلم كقصة كوميكس كل ده لم يشفع لنا ان الاداء التمثيلي نفسه كان ضعيف. بالتالي حسينا في النهاية أن المعادلة مش مظبوطة.
باختصار.. فيلم Birds of Prey بيقدم المعادلة التقليدية لأفلام السوبر هيرو القائمة على شرير سيكوباتي ومجموعة من (الطيبين) اللي بتواجهه.. لكن المعادلة كان ناقصة تمثيل أفضل وسيناريو أقوى علشان يعجبنا.
