Black Christmas: أين لا تذهب هذا المساء!
بعض الأفلام بتستغل توقيت عرضها في مواسم معينة علشان تقدم لنا عمل يحقق نجاح مضمون. لكن وعلى الرغم من عرض Black Christmas في موسم الكريسماس لكنه ماقدرش يحقق معادلة النجاح رغم سهولتها!
وللأسف نفس الفشل ده بنشوفه في أفلام الرعب اللي بيتم عرضها في مواسم الهالوين وباقي المواسم المحفوظة اللي بيتعرض فيها أفلام بتيمات معينة.
Black Christmas بيحكي عن مجموعة شابات بيتجمعوا مع بعض. ثم بيبدأ قاتل غامض في قتلهن. ثم مع الوقت بيبدأوا في اكتشاف حقيقة الأحداث المرعبة اللي بيعيشوها. القصة اللي شوفناها في ألف فيلم قبل كده لدرجة بتخلينا كمشاهدين عارفين كل تفصيلة في الفيلم من قبل ما تحصل ويمكن من أول ما شوفنا تريلر الفيلم أصلا.
لما بنشوف فيلم زي Black Christmas بنبقى عارفين أننا أمام حبكة مكررة شوفناها في أكتر من فيلم قبل كده. علشان كده رهاننا الأساسي بيكون على العناصر المساعدة للحبكة زي تنفيذ مشاهد الرعب والقتل والمؤثرات الخاصة والأداء التمثيلي. وللأسف الفيلم فشل في كل ده!
الأداء التمثيلي كان ضعيف وتنفيذ مشاهد القتل مافيهوش أي نوع من الابتكار وكل مشهد نقدر نعرف بدايته ونهايته ونتوقعهم. وده مش علشان احنا عباقرة لكن علشان الفيلم فعلا خالي من أي ابتكار.
على كل الأحوال احنا مش عارفين مين ممكن يعجبه فيلم Black Christmas إلا لو حد عاوز يضيع حوالي ساعة ونصف من عمره مع فيلم (أتهرس) من حيث القصة والفكرة والتمثيل في ألف فيلم قبل كده.
