Black Or White : فيلم درامي عن العنصرية
ابراهام لنكولن الرئيس 16 للولايات المتحدة واللى قاد حرب ضخمه لتحرير العبيد. مارتن لوثر كينج اللى قاد نضال شعبي واسع للحفاظ على حقوق السود والمساواة بينهم وبين البيض، كل المجهودات دي جابت نتايجها على مر الزمن. لكن هل تغيير القوانين والدساتير، قادر على تغيير العقول واساليب التفكير؟!
الفيلم بيبدأ بمشاهد ضيقة ومركزة وتفصيلية لملامح وجه (كيفن كوستنر) او (اليوت) وهو فى واحدة من أسوء حالاته –فى الفيلم- كان لسه عارف للتو خبر وفاة زوجته، اللى قضت معاه عمره كله، واللى بنعرفه بعد كده ان وفاة زوجته جت بعد وقت قصير من وفاة ابنته اللى سابت المنزل وتزوجت رجل اسود البشرة لم يكن يعرف تاريخها المرض، الامر اللى ادي لوفاة البنت اثناء الولادة بسبب متاعب قديمة فى القلب بعدما تركت بنت سمراء جميلة.
البنت السمراء (ايلوز) (جيليان استل) هى التعزية الوحيدة الباقية فى حياة (اليوت) الخالية من اى مشاعر بالحب او الحنان، بينخرط بعدها فى ادمان الخمور واهمال عمله كمحامي كنوع من انواع الحزن على زوجته وابنته وحفيدته، الى ان تاتي القشة اللى بتقسم ظهر البعير.
جدته ابنته من ناحية الاب، والاب نفسه، بيظهروا فجأة وبيرفعوا دعوي قضائية لاسترداد حضانة البنت، وتربيتها مع جماعتها الطبيعية من السود، بدلا من حياتها مع رجل ابيض، الامر اللى بيوصل بـ(اليوت) للمنتهي من الحزن والغضب، وبيبدأ يتخذ تدابير احتياطية و…. الحقيقة احنا مش عاوزين نحرق الاحداث اكتر من كده.
المخرج مايك بندر قدر انه ينقل للمشاهد حالة الوحدة والقلق والخوف اللى عايشها البطل بعد الوحده اللى اصبح موجود فيها، فى المقابل بيتم اظهار العائلة السوداء البشرة بانها عائلة مرحة ومتقبلة للحياة، لكنها بتعاني مشاكل الادمان والاستهتار مع ابنها والد ايلوز.
ادمان الخمور وتعاطي المخدرات واستخدام السلاح الابيض كانوا من المرادفات المهمة جدا فى الفيلم، ويعتبر الفيلم من الافلام النادرة اللى بتسلط الضوء بشكل حقيقي على حقيقة المجتمع الامريكي كمجتمع لسه العنصرية موجوده فيه بالاضافة لكتير من سمات التفكك الاخلاقى والمجتمعي، وهى نقط مش بتركز عليها باقى الافلام.
الموسيقي التصويرية كانت متميزه فى كتير من المشاهد، الديكورات ايضا كانت قوية وجذابة وقدرت تعطينا انطباعات جمالية – او حتي غير جمالية- وفقاً لرغبة المخرج حسب كل مشهد، لكن اداء كيفن كوستنر على الرغم من قوته فى المشاهد الاخيرة الا ان الملل تسرب لنا بسبب اداؤه فى بعض المشاهد فى النصف الاول من الفيلم.
مع نهاية Black or White مش هاتقدر تحدد انت مع اي طرف بالظبط، لكن الفيلم ممكن يخليك تعيد التفكير فى كتير من الثوابت المنطقية فى دماغك. ودي ممكن نقول انها الميزة الحقيقية الوحيده وراء العمل.
